Փաստ ինֆո

Երևանի Տերյան փողոցում ուսանող Տիգրան Հայրապետյանի սպանության գործով այսօրվա դատական նիստում հայտարարվեց դատաքննության ավարտի մասին: Մեղադրող Հակոբ Մելքոնյանը դատարանից ողջամիտ ժամկետ խնդրեց՝ մեղադրական ճառը նախապատրաստելու համար: Ժամկետը տրամադրվեց:

Մինչ դատաքննության ավարտը՝ սպանության մեջ մեղադրվող անչափահաս Հայկ Աղամալյանի պաշտպան Սեյրան Գրիգորյանի միջնորդությամբ հարցաքննվեց դատաբժիշկ փորձագետը: Ի պատասխան պաշտպանական կողմի հարցերի՝ փորձագետը հայտնեց, որ տուժողը կրծքավանդակի վնասվածք կարող էր ստանալ տուժողի՝ ցանկացած դիրքում գտնվելու պարագայում՝  բացառությամբ բերանքսիվայր պառկած վիճակում գտնվելու դիրքից:

«Թե հարված հասցնողն ի՞նչ դիրքում է գտնվել, ես չեմ կարող ասել»,- ասաց փորձագետը՝ հավելելով, որ տուժողի վնասվածքները  կարող են պատճառված լինել թե՛ նույն դանակով, թե՛ տարբեր դանակներով:

Պաշտպանական կողմը միջնորդեց դատատեսաձայնագրային փորձաքննություն նշանակել՝ տեսաձայնագրություններից պարզելու դեպի Տերյան փողոց քայլող խմբի մեջ մուգ հագուստով, ակնոցով անձնավորության առկայությունը:

Մեղադրողը առարկեց միջնորդության դեմ՝ ընդգծելով, որ տեսաձայնագրության վերաբերյալ փորձաքննությամբ հնարավոր եզրահանգումներ արդեն արվել են: Իսկ տուժողի իրավահաջորդ Պատվական Հայրապետյանը հայտարարեց, որ, մասնավորապես, վկա Ռոբերտ Խաչատրյանի ցուցմունքներով՝ ակնոցներով, դանակը ձեռքին և «ո՞վ է  խփել իմ ընկերոջը» բացականչած անձնավորությունը նույն մարդն է՝ Հայկ Աղամալյանը, նա էլ սպանել է Տիգրանին:

Դատարանը մերժեց պաշտպանական կողմի այս միջնորդությունը, ինչպես նաև պաշտպանական կողմի ներկայացրած դատահետքաբանական, դատաբժշկական փորձաքննություն նշանակելու միջնորդությունը՝ անհիմն լինելու պատճառով: 

Պաշտպանական կողմը հայտնեց նաև, որ դիմել է ՀՀ գլխավոր դատախազին՝ նոր ապացույցներ ստանալու ակնկալիքով, սակայն պատասխան դեռևս չի ստացել: Ուստի՝ խնդրեց հետաձգել դատական նիստը՝ մինչև գլխավոր դատախազից պատասխան ստանալը:

Դատարանը պարզաբանեց, որ դատական վիճաբանությունների փուլում էլ եթե նոր ապացույցներ ի հայտ գան, կողմի միջնորդությամբ կարող է որոշում կայացվել՝ դատաքննությունը վերսկսելու մասին: