Փաստ ինֆո

ՀՀ կառավարության այսօրվա նիստում որոշում ընդունվեց հայտարարված աճուրդը չկայանալու դեպքում պետականացնել գործարար Միխայիլ Բաղդասարովին պատկանող «Միկա» մազահամալիրը:

Ինչպես ավելի վաղ հայտնել էինք, մարզահամալիրը աճուրդի է դրվել գործարարին պատկանող «Արմավիա» ընկերության պարտքերի դիմաց: Եվ, գործադրի որոշմամբ, աճուրդի հայտարարված ժամկետի ընթացքում` մինչև սեպտեմբերի 4-ը, գնորդ չլինելու դեպքում «Միկա»-ն իր ողջ գույքով կանցնի ֆինանսների նախարարության հաշվեկշռին ճիշտ այնպես, ինչպես դա եղավ «Կարեն Դեմիրճյանի անվան մարզահամերգային համալիր»-ի դեպքում:

Կառավարություն ներկայացված նախագծով՝ «Միկա»-ի արժեքը գնահատվել է 9 045 000 000 դրամ, որից 7 171 858 400  դրամը «Արմավիա» ավիաընկերության հարկային չվճարված պար­տավորությունների չափն է, 365 340 100 -ը` «Միկա Քորփորեյշն» փակ բաժնետիրական ըն­կերության՝ 2014 թվականի օգոստոսի 20-ի դրությամբ չկատարված հար­­­­կային պարտավորությունների, իսկ 1 507 801 500-ը` դատական ակտերի հարկադիր կատարման ծառայության կողմից հար­կա­դիր էլեկտրոնային աճուրդով սահմանված արժեքից առաջացած ավելացված արժեքի հարկի գծով պար­տա­վորության չափն է:

Ի դեպ, նախագծի քննարկման ժամանակ այս իրողության վրա հատուկ ուշադրություն դարձրեց նաև վարչապետ Հովիկ Աբրահամյանը` ասելով. «Պետությանը, փաստորեն, պարտք է 7.1 մլրդ, հիմա եթե մենք 9 մլրդ-ով դնենք, հետո խնդիրներ չառաջանան, պետությունը չտուժի այս գործարքից»:

Կառավարության նիստի ավարտին հարցը ներկայացնող Ֆինանսների փոխնախարար Պավել Սաֆարյանից հետաքրքրվեցինք, թե ի՞նչ խնդիրների մասին էր ակնարկում վարչապետը:

«Մենք 9 մլրդ որ գնահատել ենք, նաև այդ 1.4 մլրդ ավելացված արժեքի հարկն է, պետք է ուղղակի ճշգրտել արժե՞ այդ ԱԱՀ-ն էլ ներառել գնի մեջ, թե՝ ոչ»,- պարզաբանեց ֆինանսների փոխնախարարը:

Ի դեպ, այս ճշգրտման համար վարչապետը պատասխանատու մարմիններին 2 օր ժամանակ տվեց:

Պավել Սաֆարյանը նաև հայտնեց, որ նույնիսկ «Միկա» մարզահամալիրի պետականացմամբ «Արմավիայի» ամբողջ պարտքը չի մարվի:

«Այս գույքով ամբողջ պարտքը չի մարվում, այս գույքով մարվում է պարտքի մի մասը, որովհետև պարտքն ավելի մեծ է»,- ասաց Պավել Սաֆարյանը` ի պատասխան «Փաստինֆո»-ի այն դիտարկմանը, որ «Արմավիա»-ի ունեցած ամբողջ պարտքը պետությանը նախապես հայտարավում էր 24.2 մլրդ-ի սահմաններում:

Լրագրողները ֆինանսների փոխնախարարից նաև հետաքրքրվեցին, թե ինչո՞ւ մինչ այս պահը կառավարությունը որևէ միջոց չէր ձեռնարկում` «Արմավիա»-ին պարտադրելու կատարել իր հարկային պարտավորությունները, որոնք, հիշեցնենք, կուտակվել են դեռևս 2010-12 թվականներից և հենց ընկերության պարզաբանման համաձայն՝ գոյացած 24 269 365 000 դրամի պարտքից միայն 7 մլրդ.-ն է բուն պարտքը, իսկ մնացած 17 մլրդ.-ը գոյացել է այդ 3 տարիների ընթացքում ընկերության նկատմամբ կիրառված տույժերի արդյունքում:

Ի պատասխան այս հարցի Պավել Սաֆարյանը տեղեկացրեց, որ 2010 թվականից ի վեր կուտակվող պարտավորությունների բռնագանձման պահանջով ՊԵԿ-ը միայն անցած ամիս է դիմել դատարան: Փոխնախարարը դժվարացավ ասել, կբավարարի՞ արդյոք Միկա Բաղդասարովի ունեցած գույքը՝ «Արմավիա»-ի ամբողջ պարտքը մարելու համար, բայց և նշեց, որ չբավարարելու դեպքում սնանկության գործընթաց կսկսվի:

Հիշեցնենք՝ իրենց սնանկ լինելու մասին Միխայիլ Բաղդասարովն ու «Արմավիա»-ի ղեկավարությունը պարբերաբար հայտարարում էին դեռս 2013թ. սկզբին, երբ ֆինանսական դժվարությունների պատճառով ազգային ավիափոխադրողը դադարեցրեց իր թռիչքները, սակայն սնանկության գործընթաց այդպես էլ մինչ օրս չսկսվեց, Միխայիլ Բաղդասարովի հզոր կարողության անհետացման առեղծվածն էլ մնաց չբացահայտված:

Լուսանկարը՝ Pan ARMENIAN Photo-ի