Փաստ ինֆո

Դատարանն այսօր բավարարեց Երևանի Կենտրոն և Նորք-Մարաշ վարչական շրջանների դատարանի շենքի դիմաց կրակոցների գործով մեղադրյալ Հայկ Կյուրեղյանի պաշտպան Արա Զաքարյանի բողոքը՝ իր պաշտպանյալի նկատմամբ   տեսակցությունների սահմանափակման, ինչպես նաև հիշյալ որոշման և փորձաքննությունների եզրակացությունների պատճենները չտրամադրելու քննիչի ու դատախազի որոշումների դեմ: Դատարանը  որոշեց վերացնել  Հ.Կյուրեղյանի իրավունքների խախտումը:

Արա Զաքարյանը լրագրողներին հայտնեց, որ եթե  դատարանի «բավականին պատճառաբանված որոշումը» չբողոքարկվի և  ուժի մեջ մտնի, «որպես այդպիսին, իհարկե, կարող է նախադեպային նշանակություն ունենալ»:

Դատարանը, մասնավորապես, փաստել է, որ անձի իրավունքներն ու ազատությունները սահմանափակող յուրաքանչյուր որոշում, եթե այն իր մեջ գաղտնիք չի պարունակում, պետք է տրամադրվի կողմին, որպեսզի վերջինս հնարավորություն ունենա արդյունավետորեն այն բողոքարկել: Դատարանը փաստել է նաև, որ  քննիչի կողմից ակնհայտորեն չեն բերվել հիմնավորումներ, որ տվյալ դեպքում իրոք կա սահմանափակումների նման անհրաժեշտություն:  

Պաշտպան Արա Զաքարյանը «Փաստինֆո»-ի թղթակցի հետ զրույցում հայտնեց, որ թեև պաշտպանական կողմը որոշակի փաստաթղթերի, այդ թվում՝ փորձաքննությունների եզրակացություններին ծանոթանալու իրավունք ունի, սակայն քննիչը հրաժարվել էր այդ փաստաթղթերի պատճենները տրամադրել իրենց:

Ըստ պաշտպանի՝ փաստաթղթերին ծանոթանալու իրավունքը նաև պատճեն ստանալու իրավունքն էլ է ներառում: Վարույթ իրականացնող մարմինը հրաժարվել էր նաև իրենց տրամադրել իր պաշտպանյալի տեսակցությունների սահմանափակման որոշումը, կողմը ստիպված է եղել այն  մեկուսարանից ստանալ:

«Այդ որոշումով սահմանափակվում է անձի իրավունքը, հետևաբար նա իրավունք ունի բողոքարկել այդ որոշումը, չի կարող բողոքարկվել մի որոշում, որը կողմին չի տրամադրվել»:

Պաշտպանը բողոքում բարձրացրել էր բուն որոշման օրինականության հարցը: Որոշումը, պաշտպանի գնահատմամբ, ակնհայտ անօրինական է. պաշտպանը վստահ է, որ տեսակցությունները սահմանափակելու որոշում միայն դատարանը կարող է կայացնել, ինչպես, օրինակ, կալանավորման որոշման դեպքում: «Օրենքում այդ հարցը որպես այդպիսին ուղղակիորեն կարգավորված չէ, քննիչի լիազորությունների մեջ որպես այդպիսին ուղղակիորեն նշված չէ»,- ասաց Արա Զաքարյանը:

Բացի այդ, պաշտպանը գտնում է, որ տվյալ դեպքում տեսակցությունները որևէ կերպ չեն կարող խոչընդոտել քննությանը՝ գործում առկա է միջադեպը պատկերող տեսանյութ, գործով որպես այդպիսին անցնում են ոստիկանության և դատական դեպարտամենտի աշխատողներ, առնվազն միամտություն կլինի ակնկալել, որ հնարավոր է նրանց համոզել ցուցմունքները փոխել: Պաշտպանի համոզմամբ՝ տեսակցությունների սահմանափակումը բացարձակապես զուրկ է օրինական հիմքից, այն սոսկ նպատակ ունի հոգեբանական ճնշում գործադրել իր պաշտպանյալի վրա: