Փաստ ինֆո

«Արմավիա-Ավիաընկերություն» ՍՊԸ-ի` ՀՀ ԿԱ ՊԵԿ Կենտրոնի հարկային տեսչությանն ունեցած  7 176 417 966  ՀՀ դրամի պարտքի դիմաց  ՀՀ վարչական դատարանը «Միկա» մարզական կոմպլեքսի գույքը հարկադիր էլեկտրոնային աճուրդով իրացնելու որոշում է կայացրել: Այս մասին «Փաստինֆո»-ի հարցմանն ի պատասխան հայտնեցին Արդարադատության նախարարության Դատական ակտերի հարկադիր կատարման ծառայությունից:

Իսկ թե ինչո՞ւ է մի ընկերության պարտքի դիմաց մեկ այլ ընկերությանը պատկանող գույքը վաճառվում: Բանն այն է, որ նույն դատական վարույթի շրջանակներում պարտապանը փոխարինվել է իրավահաջորդով, այսինքն`՝ «Արմավիա-Ավիաընկերություն» ՍՊԸ-ը փոխարինվել է «Միկա Քորփորեյշն» ՓԲԸ-ով, քանի որ երկուսն էլ պատկանում են նույն սեփականատիրոջը` Միխայիլ Բաղդասարովին:

Հիշեցնենք` սնանկացած, բայց այդպես էլ դատական կարգով սնանկ չճանաչված գործարարը բազմաթիվ պարտքեր էր կուտակել, որոնք անկարող լինելով վճարել` ավելի քան 1 տարի առաջ ուղղակի հրաժարվել էր իր բոլոր բիզնեսներից  և, ըստ լուրերի, լքել Հայաստանը:

Ի դեպ, մինչ այդ «Արմավիա Ավիաընկերությունը» հրապարակել էր պետությանն ունեցած իր պարտքերի ցուցակը, որի համաձայն` ազգային փոխադրողը 2010-12թթ. ընթացքում պետական բյուջեին կուտակել էր 24 269 365 000 դրամի պարտք:

Ընդ որում, ընկերությունը հայտարարում էր, որ այս գումարից միայն 7 մլրդ-ն է բուն պարտքը, իսկ մնացած 17 մլրդ-ը գոյացել է 3 տարիների ընթացքում ընկերության նկատմամբ կիրառված տույժերի արդյունքում:

Հետաքրքրական է, որ ՊԵԿ-ը դատական կարգով «Արմավիա»-ից հենց 7 մլրդ դրամի բռնագանձման պահանջ է ներկայացրել:

Նշենք նաև, որ «Միկա» մարզադաշտի համար հայտարարված աճուրդի մեկնարկային գինը սահմանվել է 9 045 100 000 դրամ: