Փաստ ինֆո

«Փաստինֆո»-ն արդեն  տեղեկացրել է,  որ Երևանի քաղաքապետարանին պատկանող «Կենտրոն Մաքրություն» փակ բաժնետիրական ընկերությունում կեղծ հավաքարարների անվան տակ հափշտակվել է շուրջ 300 մլն դրամ։ Ըստ գործի տվյալների՝ այստեղ աշխատավարձեր են դուրս գրել ու հափշտակել շուրջ 115 հավաքարարի անվան տակ. կեղծ հավաքարարների մեխանիզմը գործել է մոտ 5 տարի՝ 2008-2013թթ.։

Այսպես, քրեական գործի նախաքննությամբ պարզվել է, որ «Կենտրոն մաքրություն» ՓԲ ընկերության ինժեներ Արթուր Հովհաննիսյանն իր եղբոր, նույն ընկերության տնօրեն Սամվել Հովհաննիսյանի փոխարեն փաստացի իրականացրել է ընկերության ղեկավարումը և 2008թ. հունվարից մինչև 2013թ սեպտեմբեր ամիսն ընկերության փոխտնօրեն Արմեն Խաչատրյանի, աշխղեկներ Սամվել Եղոյանի և Գուլիզար Շամոյանի հետ միասին «Կենտրոն մաքրություն» ՓԲ ընկերությունում որպես հավաքարար աշխատանքի ընդունված շուրջ 115 անձանց փաստացի ազատել են աշխատանքային պարտականությունների կատարումից, սակայն յուրաքանչյուր ամիս շահադիտական նպատակով կազմել և ՓԲ ընկերության հաշվապահություն են ներկայացրել աշխատաժամանակի հաշվարկի վերաբերյալ կեղծ տեղեկագրեր՝ դրանցում նշելով 115 անձանց աշխատանքային պարտականությունները պատշաճ կատարելու վերաբերյալ ակնհայտ կեղծ տեղեկություններ:

Արդյունքում՝ ընկերության գլխավոր հաշվապահ Գագիկ Հարությունյանի հետ միասին, շարունակաբար հիշյալ անձանց բանկային պլաստիկ քարտերի օգտագործմամբ խարդախությամբ հափշտակել են աղբահանության և սանիտարական մաքրման ծառայությունների գնման պայմանագրով ստանձնած պարտավորությունների կատարման համար Երևանի քաղաքապետարանի կողմից «Կենտրոն մաքրություն» ՓԲ ընկերությանը տրամադրված` որպես վերջիններիս աշխատավարձ հաշվարկված և բանկային քարտերին փոխանցված առանձնապես խոշոր չափի՝ 298.000.000  ՀՀ դրամ գումարը:

Նախաքննական մարմինն ընկերության տնօրեն Սամվել Հովհաննիսյանին մեղադրանք է առաջադրել ՀՀ քրեական օրենսգրքի 38-178-րդ  հոդվածի 3-րդ մասի 1-ին կետով՝ առանձնապես խոշոր չափերի խարդախությանն օժանդակելը, և 308-րդ հոդվածի 2-րդ մասով՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ: Նրա նկատմամբ որպես խափանման միջոց է կիրառվել կալանավորումը:  

Ընկերության աշխղեկներ Սամվել Եղոյանին, Գուլիզար Շամոյանին, ընկերության փոխտնօրեն Արմեն Խաչատրյանին, գլխավոր հաշվապահ Գագիկ Հարությունյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով: Նրանց նկատմամբ խափանման միջոց է ընտրվել չհեռանալու մասին ստորագրությունը:  

Ընկերությունը փաստացի ղեկավարած գլխավոր ինժեներ Արթուր Հովհաննիսյանը գործում ներգրավվել է որպես մեղադրյալ՝ առանձնապես խոշոր չափերի խարդախության մեղադրանքով: Նրա նկատմամբ խափանման միջոց է ընտրվել կալանավորումը և հայտարարվել հետախուզում:

Նշենք, որ հափշտակված հսկայական գումարից վերականգնվել է ընդամենը 8.332.000 ՀՀ դրամը: