Փաստ ինֆո

ՀՀ կառավարությունը 6030 եվրո կհատկացնի՝ Մարդու իրավունքների եվրոպական դատարանի վճռով նախատեսված փոխհատուցումը Վարդան Մինասյանին վճարելու համար:

Մինասյանն ընդդեմ Հայաստանի գործով 2014 թվականի ապրիլի 8-ին ԵԴ կայացրած վճռով՝ Հայաստանի Հանրապետությունը Վարդան Մինասյանին պարտավոր է, վճիռն օրինական ուժի մեջ մտնելուց հետո երեք ամսվա ընթացքում, վճարել 6030 եվրո, որի 6000-ը՝ որպես ոչ նյութական վնասի, իսկ 30 եվրոն՝ որպես ծախսերի ու ծախքերի փոխհատուցում:

Դե իսկ քանի որ 2014թ. ապրիլի 8-ին կայացած վճիռն օրինական ուժի մեջ է մտել սույն թվականի հուլիսի 8-ին, փոխհատուցման տրամադրման վերջնաժամկետը 2014 թվականի հոկտեմբերի 8-ն է: Այս ժամկետը չուշացնելու համար 6030 դրամի տրամադրման հարցը ներառվել է կառավարության վաղվա նիստի օրակարգում:

Հիշեցնենք՝ ապրիլի 8-ին Մարդու իրավունքների եվրոպական դատարանի կայացրած հերթական վճիռը ՀՀ-ի դեմ վերաբերում էր 40-ամյա Վարդան Մինասյանի նկատմամբ կիրառված անօրինական կալանքին։

Մինասյանը ներգրավված էր 2007թ. դեկտեմբերի 18-ին 2 խմբավորումերի միջեւ տեղի ունեցած փոխհրաձգության գործում, որի արդյունքում մեկ մարդ մահացել էր եւ երկուսը՝ վիրավորվել։

Վարդան Մինասյանը դեպքից 2 օր անց ինքնակամ ներկայացել էր ոստիկանություն։ Այստեղ նրան անմիջապես կալանավորվել էին, ապա դատարանի կողմից նախնական կալանքը երկարաձգվել էր 7 անգամ՝ մինչ 2009թ. մայիսի 8-ը:

Քրեական գործը դատարան ուղարկելուց հետո Մինասյանն օրեր շարունակ շարունակել է կալանքի տակմնալ` առանց դատարանի որոշման։

Վերաքննիչ դատարանն էլ հրաժարվել էր քննել կալանքի տակ պահելու ժամկետը երկարացնելու մասին որոշման դեմ ներկայացված վերաքննիչ բողոքը:

Ապրիլի 8-ին ԵԴ-ն ճանաչել էր ՀՀ-ի կողմից Վարդան Մինասյանի իրավունքների խախտման փաստը: