Փաստ ինֆո

Դատական ակտերի հարկադիր կատարման ծառայությունը հայաստանյան հերթական մեծ մարզական համալիրն է հանել աճուրդի: Այս անգամ խոսքը գործարար Միխայիլ Բաղդասարովին պատկանող «Միկա» մարզադաշտի մասին է:

Սնանկացած, բայց այդպես էլ դատական կարգով սնանկ չճանաչված գործարարը բազմաթիվ պարտքեր էր կուտակել, որոնք անկարող լինելով վճարել՝ ուղղակի հրաժարվել էր իր բոլոր բիզնեսներից և, ըստ լուրերի, լքել Հայաստանը:

Թե դատարանի ո՞ր որոշման կամ ու՞մ հայցի արդյունքում է վաճառքի հանվել նրան պատկանող մարզադաշտը, ԴԱՀԿ ծառայությունը չի պարզաբանում:

Լոտի նկարագրություններում նշված է միայն, որ մարզական համալիրն ունի 4 հարկ, «ապահովված է նոր հիմնանորոգված ժամանակակից պոմպակայանով, անհատական ջեռուցման համակարգով և օդորակիչներով»:

Ընդհանուր մակերեսը՝ 3658.9մ² է, մարզաադաշտինը` 5421.5մ², տեղավորում է  7250 մարդ: Առկա է նաև «սեփականության իրավունքով, բնակավայրերի նշանակության, մարզական կոմպլեքսի համար հողամաս՝ 28846.3մ²:

Շենքի հատակագիծը բաժնում գծանշված 5421.5մ² արտաքին մակերեսով շինությունները համարվում են ինքնակամ կառուցված»:

Ի դեպ, մարզական համալիրը Մ.Բաղդասարովը կառուցել է 2008թ., այնտեղ իր մարզումներն է անցկացնում «Միկա» ֆուտբոլային ակումբը:

Նշենք, որ «Միկա» մարզադաշտի համար հայտարարված աճուրդի ժամկետն ավարտվում է սեպտեմբերի 4-ին: Մեկնարկային գին է սահմանվել 9 045100 000 դրամ: