Փաստ ինֆո

«Օֆշորի գործով» կալանավորված գործարար Աշոտ Սուքիասյանի փաստաբան Յուրի Խաչատրյանն այսուհետ ստիպված է սահմանափակել իր շփումները մամուլի հետ:

Բանն այն է, որ նախաքննական մարմնի պահանջով փաստաբանը նախաքննական գաղտնիքը չհրապարակելու ստորագրություն է տվել: Այս մասին Յուրի Խաչատրյանը հայտնեց «Փաստինֆո»-ի հետ զրույցում: Մեր հարցին, թե նրան չի՞ անհանգստացնում արդյոք գործի գաղտնիության փուլ մտնելը, փաստաբանն ասաց. «Գաղտնիության փուլը Քրեական դատավարության օրենսգրքով է նախատեսված, նախաքննության կատարման ընթացքում գաղտնիությունը պետք է պահպանվի, չհրապարակվի, դրա համար, երբ որ մի քիչ ավել տեղեկություն է հրապարկվում, արգելվում է քննիչի որոշմամբ»:

Ինչ վերաբերում է Աշոտ Սուքիասյանի և գործարար Փայլակ Հայրապետյանի՝ սպասվող առերեսման մասին հայտարարություններին, փաստաբանը նշեց, որ նման տեղեկություն ինքը չունի: «Դա քննչական գործողություն է, քննիչն է որոշում. երբ որ կորոշի, տեղի կունենա, ինչ-որ մեկը չի կարող ասել, երբ կլինի»,- ասաց Յուրի Խաչատրյանը:

Հիշեցնենք՝ Ոստիկանության քննչական գլխավոր վարչության հատկապես կարևորագույն գործերով վարչության վարույթում քննվող քրեական գործը հարուցվել էր շուրջ 1 տարի առաջ` 2013 թվականի հունիսին: Գործի շրջանակներում որոշում էր կայացվել կալանավորել Աշոտ Սուքիասյանին և նրա նկատմամբ հայտարարվել էր հետախուզում:

Սուքիասյանին մեղադրանք էր առաջադրվել ՀՀ Քրեական օրենսգրքի 178-րդ հոդվածի 3րդ մասի 1-ին կետի, 184-րդ հոդվածի 2-րդ մասի 1-ին կետի և 190-րդ հոդվածի 3-րդ մասի 1-ին կետի հատկանիշներով, այն է` խոշոր չափի խարդախության, առանձնապես խոշոր չափերի գույքային վնաս պատճառելու, առանձնապես խոշոր չափերով հանցավոր ճանապարհով ստացված եկամուտներն օրինականացնելու հիմքով:

2014թ. սկզբին Աշոտ Սուքիասյանը հայտնաբերվեց Վրաստանի իրավապահների կողմից և արտահանձնվեց ՀՀ-ին:

Ամեն ինչ սկսվեց «Հետք» պարբերականում հրապարակված լրագրողական հետաքննությունից, որի հեղինակները բացահայտում էին, որ գործարար Փայլակ Հայրապետյանի հետ կնքված գործարքի արդյունքում գրավադրված գույքի դիմաց ստացած շուրջ 10 միլիոն դոլարը Աշոտ Սուքիասյանը փոխանցել է օֆշորային գոտում գրանցված կազմակերպությունների հաշիվներին:

Լրագրողը բացահայտում էր նաև, որ հիշյալ կազմակերպության բաժնետերերից են վարչապետ Տիգրան Սարգսյանն ու Հայ առաքելական եկեղեցու Արարատյան հայրապետական թեմի առաջնորդ Նավասարդ արք. Կճոյանը:

Ավելի ուշ, սակայն, Սուքիասյանը հայտարարեց, որ օֆշորային կազմակերպությունների հիմնադիրն, իրոք, ինքն է, իսկ վարչապետի ու Կճոյանի անունները գրանցել է՝ առանց նրանց գիտության ու համաձայնության` իր բիզնեսն ապահովագրելու համար:

Աշոտ Սուքիասյանը կալանավորվել է հունիսի 19-ին՝ Վրաստանից Հայաստան արտահանձնվելուց անմիջապես հետո: Երկամսյա  կալանքի ժամկետը լրանալուց հետո՝ օրեր առաջ, այն երկարաձգվել է ևս 2 ամսով:

Մեր հարցին, թե արդյոք սա նշանակու՞մ է, որ նախաքննությանը կշարունակվի ևս առնվազն 2 ամիս, Աշոտ Սուքիասյանի փաստաբան Յուրի Խաչատրյանը պատասխանեց. «Շտապելու խնդիր չկա, մենք միայն ուզում ենք, որ ամբողջ ծավալով քննություն գնա, որպեսզի կարողանա պաշտպանական կողմն իր բոլոր նյութերը ներկայացնի և պաշտպանական ճիշտ դիրքորոշում հայտնի, ավելի լավ է օբյեկտիվ քննություն կայանա»: