Փաստ ինֆո

Ոստիկանության համակարգում ֆինանսական բուրգի գործով այսօրվա դատական նիստն էլ կանխատեսելի հետևանք ունեցավ, այսինքն՝  չկայացավ:  

Դատարանը կողմերին տեղեկացրեց, որ գործով միակ ամբաստանյալ Արթուր Անդրեասյանի համար դատարան է հրավիրել շտապբուժօգնություն, ամբաստանյալին ներարկվել է երեք անուն դեղ, այդ թվում՝ անալգին և դիմեդրոլ: Բժիշկը նաև արձանագրել է, որ ամբաստանյալին հանգիստ է պետք:

Դատարանի հարցին, թե «եթե վատ եք զգում, ինչո՞ւ քրեակատարողական հիմնարկում չեք ասում, որ դատական նիստին ի վիճակի չեք մասնակցել», ամբաստանյալը հայտարարեց, որ քրեակատարողական հիմնարկում էլ իրեն թույլ էր զգում, իսկ ճանապահին ավելի վատացավ:

Պաշտպանական կողմի միջնորդությունը ամբաստանյալի ընդհանուր վիճակը ճշտելու համար կրկնակի դատաբժշկական փորձաքննություն նշանակելու մասին առայժմ մնաց առկախ, ամբաստանյալը հայտարարեց, որ ինքն ի վիճակի չէ մասնակցել դատական նիստին, հետևաբար՝ անգամ կարծիք հայտնել միջնորդության վերաբերյալ:

Մեղադրող Արթուր Երիցյանը նկատեց, որ եթե ամբաստանյալի վիճակը վատ է, քրեակատարողական հիմնարկը պետք է ամբաստանյալին դատարան չուղարկեր կամ պետք է ուղարկեր «Դատապարտյալների հիվանդանոց». չի արվել ոչ մեկը, ոչ մյուսը:

Մեղադրողը տեսակետ հայտնեց, որ գուցե նպատակահարմար է դատական նիստերը մեկուսարանում անցկացնել: Եթե հաջորդ դատական նիստում մեղադրող կողմը նման միջնորդությամբ հանդես գա, ապա դատարանն այն կքննի, իսկ այսօրվա նիստը դատարանը հետաձգեց՝ հիմնականում հիմնվելով շտապօգնության բժշկի եզրակացության վրա:

Աղմկահարույց այս գործը նախաքննության փուլում, հիմնվելով նաև մամուլի հրապարակումների վրա, աղմկոտ բացահայտումներ էր ենթադրում, գործի հետ կապվում էին ոստիկանության բարձրաստիճան պաշտոնյաներ, նրանք դարձան նախկիններ ու մոռացվեցին, իսկ գուցե միտումնավո՞ր մոռացության մատնվեցին:

Գործը «բարդվեց» մեկ ամբաստանյալի վրա, ով ամեն դատական նիստին հայտարարում է, որ ինքը վատ է, չի կարող մասնակցել    դատաքննությանը. ո՞ւմ է այս վիճակը ձեռնտու:

Անգամ նշանակված դատաբժշկական փորձաքննությունը մեծ հաշվով ոչինչ չփոխեց, քանի որ չէր անցկացվել գործիքային հիմնավոր հետազոտություն: Պատահական չէ, որ, ըստ ամբաստանյալի պաշտպան Մնացական Սարգսյանի, փորձաքննության եզրակացությունը չէր կարող ճշգրտորեն արտացոլել  ամբաստանյալի ներկայիս առողջական վիճակը, քանի փորձաքննության եզրակացության համար հիմք են ծառայել 6 ամսվա վաղեմության բժշկական փաստաթղթերը և շուրջ 5 րոպե տևած զրույցը իր պաշտպանյալի հետ:

Դատաբժշկական հանձնաժողովային փորձաքննության եզրակացության համաձայն՝ ամբաստանյալը  կարող է մասնակցել դատական նիստերին, նա իշեմիկ ինսուլտ է տարել, որից առաջացել են մնացորդային երևույթներ, հիվանդությունները չեն դասվում ծանր հիվանդությունների շարքին և հոգեկան խանգարումներ չեն կարող առաջացնել:

Ի դեպ, օգոստոսի 20-ին անցկացված հետազոտության համաձայն՝ ամբաստանյալի մոտ ձախ թալամուսի շրջանում եղած լակունար կիստաների չափերը, նախորդ հետազոտության համեմատ, մեծացած են, նկատվում է բացասական դինամիկա: