Փաստ ինֆո

Պարզվում է` երբ նույն ինքնաթիռով թռչում են նախարարն ու նրա ենթակաները, նախարարին մատուցվող ծառայությունները մի քանի միլիոն դրամով ավելի թանկ են գնահատվում իր ստորադասների նկատմամբ: Իհարկե, նախարարը երթևեկում է բացառապես «բիզնես» կարգով, բայց նույնիսկ այս դեպքում, մեղմ ասած, կասկածելի է թվում ավիատոմսի` ավելի քան 7 անգամ թանկ արժենալու փաստը:

Այս տարի ամռանը տրանսպորտի և կապի նախարար Գագիկ Բեգլարյանի գլխավորած պատվիրակությունը մեկնել է ԱՄՆ: Նախարարի հետ մեկնել են նաև նախարարության աշխատակազմի ղեկավար Գագիկ Գրիգորյանն ու Արտաքին կապերի և ծրագրերի վարչության պետի պաշտոնակատար Աշխեն Մկրտչյանը: Ընդ որում, վերջինները մեկնել են «էկոնոմ», իսկ նախարարը` «բիզնես» դասով:

Կառավարության պաշտոնական կայքում հրապարակված փաստաթղթի համաձայն` նախարարության պատվիրակությունը մեկնել է մայիսի 31-ին` Երևան-Մոսկվա-Փարիզ-Լոս Անջելես երթուղով, վերադարձել հունիսի 7-ին` Լոս Անջելես-Փարիզ-Երևան երթուղով: Այսինքն` միասին մեկնել, միասին վերադարձել են նույն ինքնաթիռներով:

Բայց նախարարի ուղևորությունը շարքային հարկատուների գրպանին արժեցել է 7 400 000 դրամ, իսկ նրա ենթականերինը` յուրաքանչյուրինը` 995 000 դրամ:

Ի դեպ, նույն փաստաթղթի համաձայն` ավիատոմսերը ձեռք են բերվել նույն «ԱՌԹԱ» ՍՊԸ-ից: Ավելորդ չէ ասել նաև, որ նշված 9 390 000 դրամը ծախսվել է այս գործուղման միայն ավիատոմսերի ձեռքբերման համար, իսկ թե որքան է արժեցել ամբողջ ուղևորությունը, պաշտոնապես չի հրապարակվում:

Հավելենք նաև, որ գործուղման նպատակը հունիսի 2-6-ը ԱՄՆ Հոթորն քաղաքում «ՍպեյսԻքս» ընկերության տնօրինության հետ հանդիպումն է եղել, որի շրջանակներում քննարկվել են Հայաստանի տիեզերական արբանյակի ստեղծման հետ կապված հարցերը:

Հիշեցնենք, այս ծրագիրը պետական մակարդակով ընդունվեց 2012թ. և առ այսօր դրա անվան տակ միայն կլորիկ գումարներ են ծախսվում, իսկ արբանյակ այդպես էլ դեռ չունենք: