Փաստ ինֆո

Շանթ Հարությունյանի ու մյուսների գործով այսօրվա դատական նիստում Շանթ Հարությունյանը հայտարարեց, որ իր մեղադրանքը խուլիգանությունից պետք է վերաորակվի իշխանության ներկայացուցչի նկատմամբ բռնության գործադրելու մեղադրանքի:

Ամբաստանյալը մանրամասնեց, որ եթե որևէ մեկին հիշատակված վերջին հոդվածով մեղադրանքն առաջադրվել է, ուրեմն «սուտ ու շառ է, որ Շանթի վրա այդ մեղադրանքը չլինի»: Այս հայտարարությանը միացան ամբաստանյալներ Վարդան Վարդանյանն ու Ալեք Պողոսյանը:

Շանթ Հարությունյանը միջնորդեց նաև, որպեսզի զրահաբաճկոնը, որն ինքը Երևանի կենտրոնում տեղի ունեցած դեպքերի օրը հագցրել էր իր անչափահաս որդու վրա, ճանաչվի որպես իրեղեն ապացույց:

Ըստ ամբաստանյալի՝ զրահաբաճկոն հագցնելու նպատակն է եղել իր որդուն պաշտպանել պրովոկատորների կողմից հրազենի կիրառումից: Դատարանը, սակայն, գտավ, որ զրահաբաճկոնը չի կարող իրեղեն ապացույց ճանաչվել, քանի որ այն հանցագործության գործիք չէ, հանցագործության հետքեր չի պարունակում, ձեռք չի բերվել հանցավոր ճանապարհով և այլն, այսինքն՝ Քրեական դատավարության օրենսգրքով նախատեսված իրեղեն ապացույց ճանաչվելու համար առկա հիմքերից և ոչ մեկին չի համապատասխանում:   

Ապա մեկը մյուսին հետևեցին ամբաստանյալների հեղափոխական հայտարարությունները: Այսպես, Ավետիս Ավետիսյանը հայտարարեց, որ իրենք չեն կարողացել հանդուրժել, որ իշխանությունները երկիրը կործանման են տանում: Նա հավելեց, որ ամբաստանյալներից ով էլ դուրս գա մեկուսացումից, «միանգամից լծվելու է Հայրենիքի փրկության գործին»:  

Սևակ Մնացականյանը հայտարարեց, որ գործելու է մինչև վերջ՝ հնարավոր բոլոր միջոցները օգտագործելով: Նա հավելեց, որ «այն ձեռքը, որ կբարձրանա իմ և իմ ժողովրդի վրա, կկտրեմ գլխի հետ միասին»:

Արմեն Հովհաննիսյանը վստահ է, որ Հայաստանում շատ վաղուց հեղափոխական իրադրություն է ստեղծվել: Ըստ նրա՝ արժեքների հեղափոխությունը կայացել է, «մենք տանուլ չենք տվել հեղափոխությունը»: Նշելով, որ «մեզ ոչ մի դատարան իրավունք չունի դատելու», նա միաժամանակ հայտարարեց՝ «եթե մենք պետք է դատվենք, դատեք մեզ որպես հեղափոխականների»:  

Այսօրվա դատական նիստում ավարտվեց գործի նյութերի հետազոտումը. մասնավորապես՝ հարցաքննվեցին երեք ոստիկան վկաներ: Դատարանում  հրապարակվեցին ևս հինգ վկաների՝ երեք քաղաքացիական անձանց և երկու ոստիկանների նախաքննական ցուցմունքները. նրանց ներկայությունը հնարավոր չէր եղել ապահովել:

Դատարանը մինչև հաջորդ դատական նիստը պաշտպանական կողմին ժամանակ տրամադրեց՝ դատաքննությունը լրացնող միջնորդություններ ներկայացնելու համար: