Փաստ ինֆո

Արագածոտնի մարզի Ավան համայնքի բնակիչները բողոք-նամակով դիմել են վարչապետ Հովիկ Աբրահամյանին` խնդրելով միջոցներ ձեռք առնել իրենց գյուղը ոռոգող Ամբերդ գետի չորացման դեմ: Գյուղացիները «Փաստինֆո»-ի հետ զրույցում պատմեցին, որ գետը ցամաքեցնողը դրա հունի վրա կառուցված ՀԷԿ-ն է, որի աշխատանքի պատճառով իրենց ցանքատարածություններն ու այգիները ամառվա շոգ եղանակին չորանում են:

«ՀԷԿ-ի պատճառով ջուր չի հասնում մեր դաշտերին, մեր անասուններին»,- ասաց գյուղի բնակիչ Սարգիս Արշակյանը և պատմեց, որ առաջին անգամը չէ, որ դիմել են մարզային ու հանրապետական մարմիններին, բայց խնդիրը չի լուծվել:

Փոխարենը` Ավանի գյուղապետ Գևորգ Գալստյանն այս խնդրի շուրջ սեփական տեսակետն ունի: Նա մեզ հետ զրույցում պնդեց, որ ջրի սակավությունը գետում բնակլիմայական պայմանների հետևանք է և ՀԷԿ-ի աշխատանքի հետ ոչ մի կապ չունի:

«Մի քանի գյուղերը` Բյուրականը, Օրգովը, Լեռնարոտը, հիմնականում մեր ոռոգման ջուրը գետից են վերցնում, հիմա գետը պակասել է, մինչև 200 լիտր է իջել, պարզ է, որ էս դժվարությունը պիտի ստեղծվի, հիմա մենք մի կերպ փորձում ենք հաղթահարել էդ դժվարությունը»,- մեր հարցին ի պատասխան` ասաց գյուղապետը` նշելով նաև դրա պատճառները. «էրաշտը, էս տարվա ձյան պակասը, ամառվա շոգը»:

Գյուղապետը նաև վստահեցրեց, որ եթե ոռոգման սեզոնին նման անհրաժեշտություն լինի, ՀԷԿ-ի աշխատանքը ժամանակավորապես կդադարեցվի: Հարցին, թե աշխատու՞մ է արդյոք ՀԷԿ-ն այս պահին Գևորգ Գալստյանը պատասխանեց. «Վերևում մի ՀԷԿ ունենք, դա ընդհանրապես չի խանգարում մեր գործերին, մեր ջրից վերև է, իսկ երկրորդ ՀԷԿ-ն աշխատում է Բյուրականի ջրերի հաշվին միայն. 30-50 լիտր ջրով էլ նա աշխատում է»:

Ի դեպ,գյուղացիների բողոքի առարկան հենց այս ՀԷԿ-ն է, որը գյուղացիները մեզ հետ զրույցում «պարսիկի ՀԷԿ» պայմանական անունով էին կոչում: Բանն այն է, որ «Ամբերդի ՀԷԿ» անունը կրող այս կառույցի հիմնադիրը, ըստ պետռեգիստրի տվյալների, ԻԻՀ քաղաքացի Փավրիզ Նոսրաթի Ալամդարն է: Նրա հետ միասին որպես հիմնադիր՝ հիշատակվում է նաև ՀՀ քաղաքացի Գուրգեն Հակոբյանի անունը:

Ավանի գյուղապետը վստահեցրեց, որ գյուղի ոռոգման ջրի խնդիրը մարզպետարանի ամենօրյա ուշադրության կենտրոնում է, սակայն ջուրն այնքան է պակասել, որ չեն հասցնում ապահովել գյուղացիների պահանջարկը:

Գյուղացիները, սակայն, այս հարցի շուրջ այլ կարծիք ունեն: Նանք վստահեցնում են, որ լուրջ են տրամադրված և պատրաստ են փակել անգամ Երևան-Գյումրի ավտոճանապարհը, մինչև որ իրենց բարձրացրած հարցին լուծում տրվի: