Փաստ ինֆո

«Պաշտպանության նախարարությունը վարկային պայմանագրում ուղղակի որպես ներկայացուցիչ է հանդես եկել մեր կառավարության կողմից, նրա հաշվեկշռում ՄՀՀ-ն չի գտնվել, իսկ համալիրի գույքը գրավադրվել է ֆինանսների նախարարությունում»,- «Փաստինֆո»-ի խնդրանքով պարզաբանելով 2009թ. կառավարությունից ստացած վարկի և այդ գործարքում Պաշտպանության նախարարության գործառույթը, ասաց Կարեն Դեմիրճյանի անվան մարզահամերգային համալիրի լրատվության և հասարակայության հետ կապերի պատասխանատու Կորյուն Գրիգորյանը:

Հիշեցնենք` երեկ կառավարության ընդունած որոշման համաձայն` վարկային պարտավորությունները չկատարելու պատճառով ՄՀՀ-ն հետ է վերցվելու դրա սեփականատիրոջից և հանձնվելու է ՊՆ-ին` «ըստ նշանակության տնօրինելու համար»:

Իսկ թե ինչու հատկապես ՊՆ-ին, թե’ կառավարության որոշումը և թե’ պատկան կառույցները չեն բացահայտում: Փոխարենը դրա՝ սեփական բացատրությունն ունի ՄՀՀ ներկայացուցիչը:

«Երբ որ մի բան անցնում է ՊՆ-ի հաշվեկշռին, ցակացած իրավական գործողությունում իրենք հանդես են գալիս փակ գաղտնի ռեժիմի տակ, այսինքն` իրավաբանը անգամ իրավունք չունի հայտարարելու, թե ինչ է կատարվում այնտեղ»,- ասում է Կորյուն Գրիգորյանը` հավելելով, որ երեկ ընդունած նոր որոշմամբ՝ կառավարությունը փորձում է կոծկել նախկինում թույլ տրված ապօրինությունները:

Ի դեպ, մեր զրուցակիցը հայտնեց, որ վերջին շրջանում ՊՆ-ն 3 միջոցառում է անցկացրել Մարզահամերգային համալիրում, որոնցից մեկը նույնիսկ 2 օր է տևել, բայց դրա դիմաց կառույցին չի վճարել:

«Պաշտպանության նախարարությունը մեզ պարտք է 60 մլն դրամ: Մենք հույս ունեինք, որ այդ գումարը գոնե կփոխանցվեր, մենք աշխատողներին աշխատավարձեր կտայինք, բայց պետությունն ինքն էլ չի վճարում»,- ասաց Կորյուն Գրիգորյանը:

Ի դեպ, ՄՀՀ-ն իր աշխատակիցներին արդեն մի քանի ամսվա աշխատավարձ է պարտք, քանի որ բանկային հաշիվների սառեցված լինելու պատճառով ազատ վճարային միջոցներ չունի:

Ի դեպ, երեկ կառավարությունում Ֆինանսների փոխնախարար Պավել Սաֆարյանը, անդրադառնալով այս խնդրին, նշեց, որ կառույցը պետականացնելուց հետո էլ պետությունն այդ մարդկաց վճարել չի պատրաստվում, քանի որ մասնավոր ընկերության պարտքերը փակելու պարտավորություն չունի: