Փաստ ինֆո

Սոցիալական ապահովության պետական ծառայության նախկին պետ Վազգեն Խաչիկյանի և մյուսների գործով այսօրվա դատական նիստում դատախազը փոփոխեց Վազգեն Խաչիկյանին, Աշոտ Աբրահամյանին, Վահագն Խաչատրյանին և Հովհաննես Գրիգորյանին առաջադրված մեղադրանքները և նրանց նոր մեղադրանք առաջադրեց:

Մեղադրող դատախազը նշեց, որ նախաքննության ընթացքում այս 4 անձանց նկատմամբ առաջադրված մեղադրանքում հափշտակված գումարի չափ նշվել է 260 մլն 956 681 ՀՀ դրամ, սակայն ընդհանուր առմամբ հափշտակված գումարի չափը կազմում է 267 մլն 266 819 ՀՀ դրամ. «հանրագումարը սխալ է գրվել»,- նշեց մեղադրողը:

Նոր մեղադրանքին ծանոթանալու և դիրքորոշում հայտնելու կապակցությամբ գործի քննությունը հետաձգվեց մեկ շաբաթով:

Նշենք, որ այսօր մի քանի ամբաստանյալների պաշտպաններ ներկայացրեցին իրենց պաշտպանյալներին բնութագրող տվյալներ՝ այդ թվում նաև ընդգծելով, որ իրենց պաշտպանյալները Ղարաբաղյան պատերազմի մասնակիցներ են:

Վազգեն Խաչիկյանի պաշտպանի կողմից դատարան ներկայացված բնութագրող տվյալների տակ էլ ստորագրել էր նրա եղբայրը՝ Ախթալայի քաղաքապետը, ինչը դատավարության մասնակիցների ծիծաղն առաջացրեց:

Ամբաստանյալ Վահագն Խաչատրյանն էլ, պարզվեց, կարգապահ, շենքի բնակիչների հարգանքը վայելող, մարդամոտ անձնավորություն է, ընտանիքի հրաշալի ղեկավար, հոգատար հայր, հրաշալի ամուսին, ինչպես նաև՝ ՀՀԿ-ում ակտիվ գործունեության համար պարգևատրվել է, բացի այդ՝ 2009-2012թթ. կայացած տեղական և համապետական ընտրություններում ընդգրկվել է տարածքային ընտրական հանձնաժողովների կազմում:

Պաշտպան Արա Զաքարյանն էլ միջնորդեց դատակոչի ցուցակում ընդգրկված բոլոր վկաներին, ովքեր հարցաքննվել են նիստը նախագահող նախորդ դատավոր  Մխիթար Պապոյանի նախագահությամբ և չեն հարցաքննվել Արշակ Վարդանյանի նախագահությամբ, նորից հարցաքննել, եթե ոչ, ապա, այդ ամբողջ նյութերը ճանաչել անթույլատրելի:

Այդ միջնորդությանը դատարանը կանդրադառնա խորհրդակցական սենյակում՝ դատաքննությամբ հետազոտված բոլոր ապացույցների համադրման և գնահատման արդյունքում: