Փաստ ինֆո

Արդեն տևական ժամանակ է, ինչ կառավարությունում խոսում են Տավուշի մարզի սահմանամերձ գյուղերի հետ կապող անվտանգ ճանապարհ կառուցելու մասին, քանի որ ներկայիս ճանապարհի մի զգալի հատվածն անցնում է ադրբեջանական դիրքերից վերահսկվող տարածքով, որտեղ թշնամու կրակոցների մշտական վտանգ կա:

Բայց որքան էլ որ հարցը հրատապ է, ինչպես այսօր պարզվեց, նոր, անվտանգ, շրջանցիկ ճանապարհի շինարարությունը կիսատ է մնացել, շինարարական կազմակերպությունը թերացել է, գումարը չի բավարարել:

Կառավարությունն այսօր որոշում կայացրեց 2014թ. պետբյուջեում վերաբաշխում կատարել և փոփոխել Այգեհովիտ-Վազաշեն-Պառավաքար-Այգեպար ճանապարհի Վազաշեն-Պառավաքար հատվածի շրջանցիկ ճանապարհի շինարարության ժամկետները:

Բանն այն է, որ, ըստ նախագծի, ճանապարհը պետք է շահագործման հանձնվեր մինչև 2014թ. հոկտեմբերի 31-ը, սակայն շինարարական կազմակերպությունը թերացել է իր պարտավորությունների կատարման մեջ, և տրանսպորտի ու կապի նախարարությունն առաջարկում է նոր պայմանագիր կնքել մեկ այլ կազմակերպության հետ` ռազմավարական այդ կարևոր ճանապարհի շինարարության մնացած հատվածն ավարտին հացնելու համար:

Արթուր Առաքելյանը հայտնեց, որ նախկին պայմանագիրը պատվիրատուի կողմից միակողմանի լուծվել է, կազմվել է նոր նախահաշիվ, որի համաձայն՝ անհրաժեշտ է լրացուցիչ 55 մլն դրամ, քանի որ աշխատանքների կատարման ընթացքում ի հայտ են եկել 9-րդ կարգի գրունտի պայթեցման լրացուցիչ աշխատանքային ծավալներ:

Այս փաստը վարչապետի կողմից այնքան էլ միանշանակ չընդունվեց: «Հիմա ո՞ւմ կարող եք համոզել, որ լրացուցիչ 55 մլն ՀՀ դրամն անհրաժեշտ է պայթեցումների հետևանքով ի հայտ եկած գրունտի տարբեր կատեգորիաների պատճառով»,- ասաց Հովիկ Աբրահամյանը:

Եվ, այդուհանդերձ, որոշումն ընդունվեց: Չնայած առկա կասկածներին, կառավարությունը 55 մլն դրամով ավելացրեց ծրագրի ֆինանսավորումը: Նիստի ավարտին, պատասխանելով ծրագրի ընթացքի վերաբերյալ լրագրողների հարցերին՝ տրանսպորտի և կապի փոխնախարար Արթուր Առաքելյանը նշեց, որ ճանապարհի այդ վտանգավոր հատվածի շինարարության համար պայմանագիր էր կնքվել «Իջևանի» ՃՇՇ-ի հետ` մեկ անձից գնման ընթացակարգով` առանց մրցույթի անցկացման, քանի որ ժամկետները սուղ են եղել, և չթաքցրեց, որ նոր կապալառուն ևս կընտրվի նույն կարգով` դարձյալ ժամանակ չլինելու պատճառով:

Ի դեպ, Արթուր Առաքելյանը դժվարացավ հիշել, թե որքան էր գնահատվել ճանապարհի այդ հատվածի շինարարությունը նախկին պայմանագրով, չհստակեցրեց նաև նոր պայմանագրի ամբողջական արժեքը: