Փաստ ինֆո

Մարզահամերգային համալիրը չի՞ կրկնի արդյոք խորհրդային շրջանի մյուս հայտնի շենքերի, ասենք` Երիտասարդական պալատի ճակատագիրը հարցին ֆինանսների փոխնախարար Պավել Սաֆարյանն այսօր հետևյալ պատախանը տվեց. «Հույս ունենանք, որ այդպես չի լինի»:

Հիշեցնենք՝ այսօր կառավարության կայացրած որոշմամբ՝ ունեցած 10 207 755 910 դրամ պարտքի դիմաց Կարեն Դեմիրճյանի անվան մարզահամերգային համալիրը` իր ենթակառուցվածքներով, հանձնվեց պետության տնօրինմանը: Լրագրողների հետ ճեպազրույցում Պավել Սաֆարյանը պարզաբանեց, որ կառույցը նախ կտեղափոխվի ֆինանսների, ապա` պաշտպանության նախարարության հաշվեկշիռ:

«Փաստինֆո»-ի խնդրանքով Ֆինանսների փոխնախարարը մեկնաբանեց նաև, թե երբ և որտեղից է գոյացել ՄՀՀ-ի պարտքը: «Եթե չեմ սխալվում, 2009թ. պարտք է վերցվել այդ կազմակերպության կողմից, պետությունը երաշխիք է տվել, այսինքն` երբ որ կազմակերպությունը չի կարողանում վարկը մարել, պարտավորությունը մնում է պետության վրա»,- ասաց նա:

Մարզահամերգային համալիրը 2005 թվականի օգոստոսին՝ ՀՀ կառավարության որոշմամբ, 5 միլիոն 700 հազար դոլարով մասնավորեցվել  էր ԲԱՄՕ ընկերությանը` ներդրումներ կատարելու պայմանով: Մասնավորեցման առաջին 3-4 տարիներին, ըստ պաշտոնապես հրապարակված տվյալների, ԲԱՄՕ-ն 4 275 000 000 դրամի ներդրում է կատարել:

Ավելի ուշ ՄՀՀ նոր տերը կառավարությունից դարձյալ մի քանի 10-յակ միլիոն դոլարի վարկ է վերցրել, որի դիմաց գրավադրել է իր բաժնետոմսերի 75%-ը:

Ի սկզբանե այդ պայմանագրի կողմ է հանդիսացել ֆինանսների նախարարությունը, որի հետ և կնքվել է վարկային պայմանագիրը, իսկ հետագայում արդեն ֆինանսների նախարարությանը փոխարինել է ՊՆ-ն:

Իսկ թե ի՞նչ հիմնավորմամբ է ֆինանսների պայմանագրի կողմ դարձել ՊՆ-ն, պետական որևէ կառույց այս ընթացքում չի մեկնաբանել:

Ի դեպ, բացի պետությանն ունեցած պարտքից՝ ՄՀՀ-ն պարտքեր ունի նաև այլ կազմակերպությունների և անձանց, այդ թվում` իր աշխատակիցներին:

Հարցին, թե նրանց չստացած աշխատավարձերի համար այսուհետ ո՞վ է պատասխանատվություն կրելու, ֆինանսների փոխնախարարը պատասխանեց. «Մեր պետական բյուջեի մեջ նման տող չկա` համալիրի աշխատողներին աշխատավարձ տալու մասին, որովհետև նա պետական հիմնարկ չի եղել: Ես զբաղվում եմ պետական բյուջեով»:

Ի դեպ, ՄՀՀ-ի վաճառքի ԴԱՀԿ ծառայության հայտարարած վերջին աճուրդը դեռ ընթացքի մեջ է, և դարձյալ առ այս պահը գնորդ չկա: Աճուրդի ժամկետն ավարտվում է միայն օգոստոսի 25-ին՝ ժամը 13:00-ին: Կառավարության այսօր կայացրած որոշման համաձայն՝ միայն այս աճուրդի ընթացքում գնորդ չլինելու դեպքում համալիրը կփոխանցվի պետությանը: