Փաստ ինֆո

«Մեքենան կարելի էր ավելի էժան առնել, ավելի թանկ առնել, իհարկե, կարծում եմ, այդ հարցը միշտ էլ քննարկելի հարց է»,- այսօր պատասխանելով ԱԺ նախագահի նոր ծառայողական ավտոմեքենա գնելու մասին հարցին՝ ասաց Ֆինանսների փոխնախարար Պավել Սաֆարյանը:

Հիշեցնենք՝ հուլիսի 24-ին կառավարությունը հաստատեց Ազգային ժողովի համար ՀՀ հարկատուների միջոցներով ավելի քան 80 հազար դոլարանոց ավտոմեքենա գնելու որոշումը: Թե կոնկրետ ու՞մ է ծառայելու թանկարժեք ավտոմեքենան, չի մեկնաբանվում, բայց տարածված լուրերի համաձայն` անձամբ ԱԺ նախագահ Գալուստ Սահակյանին:

Ինքը` Գալուստ Սահակյանը, օրեր առաջ անդրադառնալով այս հարցին, ասել էր որ առաջիկայում պետբյուջեի հաշվին դարձյալ ծառայողական թանկարժեք ավտոմեքենաներ են գնվելու, քանի որ «երբ արտերկրից հյուրեր են գալիս, և մենք մեքենաներ ենք պատվիրում, ավելի թանկ է նստում ԱԺ-ի վրա, քան երբ ինքդ ես շահագործում»:

ԱԺ նախագահը հայտարարել էր նաև, թե այդ ավտոմեքենաները պետության ամրության համար են, ոչ թե՝ իրենց:

Ֆինանսների փոխնախարարից այսօր լրագրողները հետաքրքրվեցին նաև, թե որքանո՞վ են նման ծախսերն արդյունավետ:

«Ես չեմ կարծում, թե բյուջեի միջոցներն անարդյունավետ են ծախսվում»,- ասաց փախնախարարը: «Բյուջեն, որի 75 %-ը աշխատավարձ, թոշակ և սոցիալական վճարումներ են, ի՞նչ եք հասկանում անարդյունավետ ասելով, ո՞նց կարելի է աշխատավարձը անարդյունավետ ծախսել»,- իր հերթին լրագրողներին հռետորական հարց ուղղեց փոխնախարարը:


                                                                                                                                                                                                           Լուսանկարը՝ Armenpress-ի