Փաստ ինֆո

«Ներսես Մելքոնյանի դեմ որևէ ապացույց առ այս պահը մեզ չի ներկայացվել»,- «Փաստինֆո»-ի հետ զրույցում ասաց Վերնիսաժի գործով կալանավորված Ն.Մելքոնյանի փաստաբան Վարդուհի Էլբակյանը և հավելեց. «Այս պայմաններում գտնում եմ՝ իր գործողություններում հանցակազմը ընդհանրապես բացակայում է»:

Փաստաբանի խոսքով՝ հենց այս` իրեն հասանելի ապացույցների վերլուծությունն էլ թույլ է տալիս եզրակացնել, որ Ներսես Մելքոնյանի մասով գործը պետք է կարճվի:

Փաստաբանը նաև այն կարծիքն է հայտնում, թե ի սկզբնե իր պաշտպանյալին մեղադրանք առաջադրելով՝ նախաքննական մարմինը նպատակ էր հետապնդում մեղմել վիճաբանության մյուս կողմի` ԱԺ ԲՀԿ խմբակցության պատգամավոր Կարո Կարապետյանի փեսայի` 28-ամյա Գոռ Առաքելյանի հանցանքը:

Հիշեցնենք՝ մայիսի 17-ին Վերնիսաժի տարածքում, ըստ նախաքննական վարկածի, Ներսես Մելքոնյանն ու Վալերի Հովհաննիսյանը վերջինիս պատկանող BMW X6 ավտոմեքենայով փակել են պատգամավորի փեսայի ավտոմեքենայի ճանապարհը, ինչի շուրջ նա նախ վիճաբանել է նրանց հետ, ապա, ավտոմեքենայից վերցնելով զենքը՝ կրակել, ընդ որում` ոչ միայն այդ երկուսի, այլև՝ Վերնիսաժում առևտուր անող ևս 2 քաղաքացիների վրա:

Ի դեպ, Ներսես Մելքոնյանի նկատմամբ խափանման միջոց կալանքն ընտրելու մասին որոշումն օրեր առաջ անփոփոխ թողեց նաև Վերաքննիչ դատարանը:

Փաստաբան Վարդուհի Էլբակյանը մեզ հետ զրույցում հայտնեց, որ պատրաստվում են դիմել նաև Վճռաբեկ ատյան:

                                                                                                                                                                                   Լուսանկարը՝ Azatutyun.am-ի