Փաստ ինֆո

Զինվորական ծառայությունից զորացրելու նպատակով կաշառք ստանալու և տալու գործով այսօրվա դատական նիստում ամբաստանյալ Դավիթ Գալեչյանը հրաժարվեց ցուցմունք տալուց` հայտարարելով, համաձայն չէ առաջադրված մեղադրանքի հետ, իսկ վերջինս պաշտպան Հարություն Բաղդասարյանը հավելեց, որ առաջադրված մեղադրանքը չի համապատասխանում իր պաշտպանյալի կատարած արարքին:

Դատարանում ցուցմունք տվեց գործով մյուս ամբաստանյալը` բժիշկ Հակոբ Մելիքյանը, ով նշեց, որ 2009թ. բուժել է Դավիթ Գալեչյանին, և որ բուժման առաջին իսկ օրվանից Դավիթը դիմել  է իրեն` օգնել զորացրվել բանակից` մատուցվող ծառայության դիմաց առաջարկելով 9000 ԱՄՆ դոլար:

Բուժումն ստանալուց հետո Դավիթը գնացել և շարունակել է ծառայությունը, սակայն հիվանդությունը խորացել է և նա կրկին հոսպիտալացվել է: Այս անգամ զննություն անցնելուց հետո հաստատապես պարզ է դարձել, որ Դավիթ Գալեչյանը ենթակա է զորացրման:

Ամբաստանյալ բժիշկը նշեց, որ, առաջին անգամ զննելով Դավիթին, իր մոտ կարծիք էր ձևավորվել,  որ հիվանդության զարգացումը բերելու է նրա զորացրման, իսկ երկրոդ անգամ զննելուց հետո արդեն պարզ է եղել, որ նա զորացրվելու է: Եվ այդ ժամանակ էլ ամբաստանյալ բժիշկը համաձայնել է գնալ գործարքի և Դավիթի հետ եկել ընդհանուր հայտարարի՝ համաձայնության գալով 6000 ԱՄՆ դոլարի վրա շուրջ, որը իրեն տրվել է մաս- մաս:

Նա նաև նշեց, որ այսպես,  թե այնպես ինքն իրավունք չուներ Դավիթին չներկայացնել Կենտրոնական ռազմաբժշկական հանձնաժողովին:

Պարզաբանենք, որ Ռազմաբժշկական հանձնաժողովի կողմից տրված եզրակացությունն ուղարկվում է Կենտրոնական ռազմաբժշկական հանձնաժողով, որտեղ էլ որոշվում է զորացրվելու հարցը:

Ամբաստանյալ բժիշկը անկեղծորեն խոստովանեց, որ հիվանդության պատկերն ինքն անբողջությամբ չի ներկայացրել Դավիթին:

Ըստ Հակոբ Մելիքյանի՝ ինքը պաշտոնատար անձ չէ, այլ ուղղակի կատարող և վերջնական որոշում կայացնելու իրավունք չունի, դա կայացնում է բաժանմունքի պետը:

Առաջադրված մեղադրանքի համաձայն՝ 39-ամյա Մելիքյանը, հանդիսանալով ՀՀ ՊՆ N զորամասի ՀՀ ՊՆ կենտրոնական կլինիկական զինվորական հոսպիտալի նյարդավիրաբուժական բաժանմունքի ավագ օրդինատոր, նախորդ տարի հունվարին բաժանմունք ընդունված զինծառայող Դավիթ Գալեչյանին զորացրելու համար, ընդառաջ գնալով վերջինիս առաջարկին, 2013թ ապրիլ-մայիս ամիսների ընթացքում անձամբ 3 փուլով ստացել է առանձնապես խոշոր չափերի հասնող 6000 ԱՄՆ դոլար գումար կաշառք:

Հակոբ Մելիքյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով, իսկ Դավիթ Գալեչյանին՝ ՀՀ քրեական օրենսգրքի 312-րդ հոդվածի 3-րդ մասի 1-ին մասով: