Փաստ ինֆո

Դեպքը տեղի է ունեցել օրերս՝ 2014թ. օգոստոսի 11-ին, և արդեն իրավապահները շատ օպերատիվ հասցրել են մեղադրանք առաջադրել՝ առանց սպասելու դատաբժշկական փորձաքննության եզրակացությունը ստանալուն և նույնպես հապշտապ, ձերբակալվածին պահելու օրենքով սահմանված 72 ժամը չլրացած՝ դիմել և ստացել են դատարանի՝ կալանավորելու թույլտվությունը:

Այսպես, Մարտունի քաղաքից ժամանած 4 անձինք չնչին պատրվակով հեռախոսային անախորժ խոսակցություն են ունեցել Վահան Սարգսյանի հետ, եւ հետևողականորեն զրույցի հրավիրել նրան: Վերջին հրավերը Վահան Սարգսյանին խաղաղասիրական է թվացել, որովհետև խումբն անախորժ իրավիճակը հարթելու պատրաստակամություն է հայտնել:

Վահան Սարգսյանը հավատացել է խմբին ու նրանց հրավերով գնացել Քասախ գյուղի մոտակայքում գտնվող «Ֆլեշ» բենզալցակայանի մոտ SSSR  նախկինում գործող խաղասրահի բակ՝ սակավամարդ մի վայր, որտեց խումբը, ճշտելով, որ հրավիրվածն իրոք Վահանն  է,   անմիջապես 4 հոգով ձեռքերով ու ոտքերով դաժան ծեծի են ենթարկել նրան. հարվածները չեն դադարել նաև Վահանի վայր ընկնելուց հետո: 

Տեղի ունեցածը «Փաստինֆո»-ի թղթակցի հետ զրույցում նկարագրեց Վահան Սարգսյանի պաշտպան Կարապետ Աղաջանյանը՝ հայտնելով, որ գետնին ընկած ժամանակ իր պաշտպանյալի ձեռքը պատահական իր է ընկել, ինքն անկանոն շարժումներ է կատարել՝ իրեն ծեծողներից ազատվելու ու իր կյանքը պաշտպանելու նպատակով: Մեկ հոգու փախուստը առիթ է դարձել, որպեսզի նա կարողանա բարձրանալ ընկած տեղից, ապա  նկատելով, որ երկու անձինք  երկու մեծ տուֆ քարի բլոկով փորձում են իրեն հարվածել՝ շրջվել է, քարերը հրել, որպեսզի իրեն չդիպչեն:

Փաստի առթիվ Մարտունու շրջանում քրեական գործ է հարուցվել (գործը հետագայում ըստ ընդդատության ուղարկվել է Կոտայքի մարզ)  ՀՀ քրեական օրենսգրքի 112-րդ և 113-րդ հոդվածների, այսինքն՝ դիտավորությամբ առողջությանը ծանր և միջին ծանրության վնաս պատճառելու  հատկանիշներով:

Ընդ որում, ըստ պաշտպանի` դեռևս անհայտ պատճառով 4 հոգու փոխարեն քննության կողմից ֆիքսված են միայն 3-ը, 4-րդը մեքենան վարող անձից վերածվել է տաքսիստի ու անէացել, այսինքն՝ ակնհայտ է, որ նրան պարտակում են:

Կարապետ Աղաջանյանը անհիմն է համարում ինչպես ՀՀ քրեական օրենսգրքի 112-րդ հոդվածի առաջին մասով իր պաշտպանյալին առաջադրված մեղադրանքը, այնպես էլ` խափանման միջոց կալանավորումն ընտրելու` դատարանի որոշումը:

Դեռևս որպես կասկածյալ` Վահան Սարգսյանը մանրակրկիտ ցուցմունքներ է տվել, անգամ մասնակցել քննչական փորձարարությանը, որի ընթացքւոմ մանրամասն նկարագրել է դեպքի հանգամանքները, թե ինչպես են իրեն ծեծի ենթարկել: Ըստ պաշտպանի` մեղադրանք առաջադրելու համար վարույթ իրականացնող մարմինն անգամ հիմք չի ունեցել՝ վնասված անձի մարմնական վնասվածքի վերաբերյալ, այսինքն՝ ակնհայտ անհիմն մեղադրանք է առաջադրվել:

Անհիմն է նաև կալանավորման որոշումը. պաշտպանը դատարանին ներկայացրել է, որ իր պաշտպանյալը նախկինում դատապարտված  ու  արատավորված չի եղել, իր խնամքին ունի երկու մանկահասակ երեխա, ամուսնացած է, գյուղապետի կողմից բնութագրվում է որպես դրական անձնավորություն:

Նշվել է, որ իր պաշտպանյալն ընդամենը փորձել է ինքնապաշտպանվել. 4 հոգու դաժան ծեծի արդյունքում անկանոն շարժումներով գուցե վնասվածք է պատճառել ինչ-որ մեկին, բայց դա պաշտպանություն է եղել:   

Պաշտպանը կալանավորման որոշման դեմ բողոք է ներկայացրել Վերաքննիչ դատարան՝ նշելով, որ ակնհայտ բացակայում է հիմնավոր կասկածը: Նա նշել է նաև, որ չի հիմնավորվել, որ իր պաշտպանյալը խուսափել է քննությունից. նա առաջին իսկ կանչով ներկայացել է վարույթ իրականացնող մարմնին, եղել է նաև մի պահ, որ նրան  բաց են թողել, ապա մի քանի ժամ անց կրկին կանչել են, նա նորից է ներկայացել վարույթ իրականացնող մարմնին:  

«Եթե հասարակ քաղաքացի է, որևէ մականուն, դիրք չունի, նշանակում է ինքնապաշտպանվելու իրավունք չունի՞, շատ հեշտ կարող են մեղադրանք առաջադրել՝ ընդհուպ մինչև կալանքի վերցնել` առանց որևէ հիմքի և օրենքով սահմանված հիմքերը պահպանելու»,- ասաց Կարապետ Աղաջանյանը՝ ներկայացնելով դեպքի վերաբերյալ նախնական փաստերը:

Նա հավելեց, որ իր պաշտպանյալի համագյուղացիները նույնպես վրդովված են այդ փաստով, պատրաստակամ են դիմել բոլոր պատկան մարմիններին, որպեսզի արդարությունը վերականգնվի: