Փաստ ինֆո

2012-13 թվականներին գյուղացիներին հատկացված դիզելային վառելիքի բաշխման պետական աջակցության ծրագրում կատարված չարաշահումների գործով Գեղարքունիքի մարզի առաջին ատյանի ընդհանուր իրավասության դատարանը մեղավոր է ճանաչել մարզի 11 գյուղապետերի և  ՏԻՄ 1 աշխատակցի:

Հիշեցնենք, ինչպես բացահայտվել էր կատարված ստուգումների արդյունքում, ՀՀ մի շարք մարզերի, այդ թվում նաև` Գեղարքունիքի  մարզի տասնյակ գյուղերի հողոգտագործողներ դիզելային վառելիքի բաշխման պետական ծրագրով ավելի քիչ գումար էին ստացել, քան նշված է եղել փաստաթղթերում:

Կառավարության որոշմամբ, 2012 թվականի գարնան, աշնան և 2013 թվականի գարնան գյուղատնտեսական աշխատանքների համար մատչելի գնով դիզելային վառելանյութի ձեռքբերման նպատակով պետական աջակցության ծրագրերով միայն այս մարզին 11.286.098 լիտր դիզելայինվառելիք է հատկացվել: Ընդ որում, կառավարության որոշմամբ, «Ֆլեշ» ՍՊԸ-ը պարտավոր էր 1 լիտր դիզելային վառելանյութը հողօգտագործողին վաճառել 350 ՀՀ դրամ արժեքով, քանի որ կրած վնասի փոխհատուցումը ընկերությունը նախապես էր ստացել` 1 լիտրի վառելանյութի հաշվարկով 2012 թվականի գարնան և աշնան ծրագրով 90 ՀՀ դրամ, իսկ 2013 թվականի գարնան ծրագրով՝ 105 ՀՀ դրամ սուբսիդիայի տեսքով, պարտավորվելով նաև չիրացված վառելանյութի քանակի համար տրամադրված սուբսիդիան վերադաձնել պետբյուջե:

Սակայն, ինչպես պարզվել է այս քրեական գործի շրջանակներում, գյուղապետերը «Ֆլեշ» ՍՊԸ-ի աշխատակիցների հետ համաձայնության գալով կեղծել են փաստաթղթերը, ուռճացված ներկայացրել գյուղացիներին բաշխված վառելիքի իրական չափը, իսկ հավելավճարները պետությանը վերադարձնելու փոխարեն բաժանել իրար մեջ ու գրպանել:

Կուտական համայնքի ղեկավար Ահարոն Աբրահամյանն, օրինակ,  Գեղարքունիքի մարզի Տորֆավան համայնքի ղեկավար, Վարդենիսի տարածաշրջանում «Ֆլեշ» ՍՊ ընկերության լիազորված անձ՝ Ահարոն Խաչատրյանի հետ համաձայնության գալով, յուրացրել են 3.825.000 ՀՀ դրամ սուբսիդիայի գումարը: Դրա համար Ահարոն Խաչատրյանը «Ֆլեշ» ՍՊ ընկերության առանձին ծառայողների հետ կազմել են կեղծ հաշիվ-ապրանքագրեր, համայնքին դիզելային վառելանյութի հանձնման-ընդունման կեղծ ակտեր, իսկ Ահարոն Աբրահամյանը իր կողմից կատարած հանցավոր արարքները քողարկելու նպատակով կեղծել է համայնքի բաշխացուցակները` իբրև թե վառելանյութը տրամադրվել է համայնքի բնակիչներին:

Այս նույն տարբերակով, նույն «Ֆլեշ» ՍՊ ընկերության լիզորված անձ՝ Ահարոն Խաչատրյանի հետ համաձայնության գալով և ընկերության աշխատակիցների միջոցով կազմակերպելով կեղծ փաստաթղթերի շրջանառության մեջ դնելը, Գեղամասար համայնքի ղեկավար Գարեգին Բեգյանը իբրև հավելագրված դիզելային վառելանյութի վաճառքի դիմաց ստացել և հափշտակել է 4.089.270 ՀՀ դրամ սուբսիդիայի պետական գումարը և այն կիսել Ահարոն Խաչատրյանի հետ: Տրետուք համայնքի ղեկավար Ալիկ Եղիազարյանը հափշտակել է 4.725.000, Ախպրաձոր համայնքի ղեկավար Լարվենդիկ Ղազարյանը` 4.275.000,  Վանևան համայնքի ղեկավար Նորայր Հարությունյանը`  3.270.000 , Մաքենիս համայնքի ղեկավար Հարություն Մանուկյանը` 3.825.000,  Նորակերտ համայնքի ղեկավար Գերասիմ Սարգսյանը` 3.600.000, Ազատ համայնքի ղեկավար Սիմոն Սահակյանը` 9.975.000, Գեղհովիտ համայնքի ղեկավար Վարդան Պողոսյանը` 3.600.000 ՀՀ դրամ սուբսիդիայի պետական գումարը և կիսել հանցակիցների հետ:

Ինքը` «Ֆլեշ» ՍՊ ընկերության լիզորված անձ՝ Ահարոն Խաչատրյանը որպես Տորֆավան համայնքի ղեկավար, 50.000 լիտր դիզելային վառելանյութի հավելագրում է կատարել: Կեղծ հաշիվ-ապրանքագրերը և հանձնման-ընդունման ակտերը ներկայացրել է «Ֆլեշ» ՍՊ ընկերություն, վերջինիս աշխատակիցները դրանք դրել են փաստաթղթաշրջանառության մեջ՝ իբրև հավելագրված դիզելային վառելանյութի վաճառքի դիմաց 54.699.270 ՀՀ դրամ սուբսիդիայի գումարի ելքագրման և կանխիկացման հիմնավորում:

Արդյունքում Ահարոն Խաչատրյանը մարզի 11 համայնքների ղեկավարների և «Ֆլեշ» ՍՊ ընկերության առանձին աշխատակիցների հետ նախնական համաձայնությամբ, հափշտակել են իրենց վստահված առանձնապես խոշոր չափերով՝ ընդհանուր 54.699.270 ՀՀ դրամ սուբսիդիայի պետական գումարը և բաժանել միմյանց միջև:

Գործի շրջանակներում մեղադրանք է առաջադրվել նաև մարզի բնակիչ

Սուրեն Մուրադյանին այն բանի համար, որ նա օժանդակել է «Ֆլեշ»-ի աշխատակիցների և համայնքների ղեկավարների կողմից նախնական համաձայնությամբ, 14.400.000 ՀՀ դրամ սուբսիդիայի գումար հափշտակելուն և պաշտոնական կեղծ փաստաթղթեր կազմելուն:

Կատարված հանցավոր արարքների համար բոլոր համայնքների ղեկավարներին մեղադրանքներ են առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով և 314-րդ հոդվածի 1-ին մասով, իսկ Սուրեն Աշոտի Մուրադյանին՝ նաև 314-րդ հոդվածի 1-ին մասով:

Արդեն դատարանում ամբաստանյալները հայտարարեցին, որ համաձայն են մեղադրանքների հետ և միջնորդեցին արագացված դատաքննության կարգ սահմանել:

Իսկ դատաքննության ավարտին դատարանը, թեև հաստատված համարեց գյուղապետերի ու նրանց հանցակիցների մեղքը, բայց և նրանց նկատմամբ որոշեց պատիժը պայմանականորեն չկիրառել` սահմանելով փորձաշրջան 1 տարի ժամկետով: