Փաստ ինֆո

Բյուրեղավանի գիշերօթիկ դպրոցում կատարված ապօրինությունների վերաբերյալ հարուցված քրեական գործի նախաքննությունը դեռ շարունակվում է: Ի պատասխան գործի ընթացքի մասին «Փաստինֆո»-ի հարցին հայտնեցին ՀՀ ոստիկանության լրատվության և հասարակայնության հետ կապերի վարչությունից:

Հիշեցնենք՝ ապրիլ ամսին ոստիկանությունը քրեական գործ էր հարուցել՝ ՀՀ քրեական օրենսգրքի 179-րդ հոդվածի 2-րդ մասով, այն է` պաշտոնեական դիրքն օգտագործելով յուրացում կամ վատնում կատարելը: Գործի շրջանակներում որևէ մեկին առ այսօր մեղադրանք չի առաջադրվել, գիշերօթիկի՝ արդեն նախկին տնօրենի նկատմամբ որևէ սանկցիա չի կիրառվել:

Դպրոցում տեղի ունեցող ապօրինություններն ու երեխաների նկատմամբ դաժան վերաբերմունքն ամիսներ առաջ քննարկման առարկա էին դարձել մամուլում ու հասարակական շրջանակներում:

Աղմկահարույց այս պատմությունն ավարտվեց վարչապետ Հովիկ Աբրահամյանի անակնկալ այցով ու տնօրեն Գայանե Մարգարյանի աշխատանքից ազատմամբ: Բայց կատարվածի համար, փաստորեն, որևէ մեկն այդպես էլ պատասխանատվության չի ենթարկվել:

Ըստ հասարակական կառույցների և ՄԻՊ գրասենյակի ահազանգերի՝ գիշերօթիկի տնօրենը վերջին երեք տարվա ընթացքում 30 գոյություն չունեցող աշխատող է գրանցել և գրպանել այդ  հաստիքների համար նախատեսված աշխատավարձերը: Իսկ տնօրենի որդին իր անձնական կարիքների համար է օգտագործել դպրոցին պատկանող ավտոմեքենան:

Արդյունքում երեխաները թերսնվել են ու զրկվել էքսկուրսիաներից, իսկ սակավաթիվ աշխատողների պատճառով` նաև պատշաճ խնամքից:

Ի դեպ, կառավարության պաշտոնական հրապարակումների համաձայն՝ տարեկան այս հաստատությանը բյուջեից հատկացվել է 113 500 900 դրամ, որից 71 625 600 դրամը ծախսվել է սպասարկող անձնակազմի ուռճացված թվի աշխատավարձերի ու հավելավճարների, 5 100 000 դրամը` երեխաների և աշխատողների համազգեստի ու հագուստի, 1 180 000-ը` գրենական պիտույքների, 23 766 200-ը` երեխաների սննդի համար:

Մնացած գումարով կատարվել են շենքի վերանորոգման, մաքրող միջոցների գնման, ինչպես նաև` տնօրենի որդու անձնական կարիքների համար ծառայող ավտոմեքենայի պահպանման ծախսերի և վառելիքի համար:



                                                                                                                                                                                                                 Լուսանկարը՝ Azatutyun.am-ի