Փաստ ինֆո

Շանթ Հարությունյանի ու մյուսների գործով այսօրվա նիստում ավարտվեց ամբաստանյալների հարցաքննությունը: Ամբաստանյալ Արմեն Հովհաննիսյանը ներկայացավ «մայոր Արմեն Հովհաննիսյան, քաղբանտարկյալ» և հայտարարեց «իշխանական բեսպրեդելի», անօրինականությունների մասին, որոնք «դեգրադացիայի են ենթարկել մեր արժեքները»:

Ամբաստանյալը հայտնեց, որ միացել է արժեքների հեղափոխությանը, անցյալ տարվա նոյեմբերի1-5-ը գտնվել է Ազատության հրապարակում, այդ ընթացքում մոտենում էին սադրիչներ՝ հատուկ ծառայությունների ներկայացուցիչներ, ովքեր համոզում էին իրենց բախում կազմակերպել իշխանության, այն է՝ ոստիկանության հետ, սակայն իրենք պարզաբանում էին, որ իրենք քաղաքական ակցիա են կազմակերպել, չեն պատրաստվում բախման, սակայն իշխանության կողմից բռնություն գործադրելու դեպքում  պաշտպանվելու են:

Արմեն Հովհաննիսյանը հայտնեց, որ երբ Շանթ Հարությունյանը մոտեցավ մայթեզրին, նրան ոստիկանները ճանապարհ տվեցին, պողոտայի երթևեկելի մասում արդեն իսկ կային այլ քաղաքացիներ:

Ոստիկան Գեղամ Խաչատրյանը քաշեց Շանթի ձեռքից և «սարքեց բախումը»: Ամբաստանյալը հայտարարեց, որ ինքը մեղավոր իրեն չի ճանաչում, իրենք ընդամենը  պաշտպանել են իրենց սահմանադրական իրավունքները, արժանապատվությունը, պաշտպանվել ոստիկանների բռնություններից:

Արմեն Հովհաննիսյանը հայտարարեց, որ որևէ հորդոր, նախազգուշացում, դիտողություն ոստիկանների կողմից չի եղել, մասնավորապես՝ չի եղել, որ ոստիկաններն ասեն իրենց, որ մայթերով քայլեն, իսկ իրենք էլ՝ հրաժարվեն կատարել նրանց հորդորները:

Ամբաստանյալ Ավետիս Ավետիսյանը նշեց, որ ոստիկանները «կռիվ սարքեցին, մենք էլ՝ պաշտպանվեցինք»: Նա հավելեց, որ ոստիկանները «հարձակվել էին մեր ընկերոջ վրա, մենք էլ խփել ենք»: Ամբաստանյալը հայտարարեց, որ չի փոշմանել, «եթե շանս եղավ, էլի եմ հեղափոխության գնալու»:

Ամբաստանյալ Հայկ Հարությունյանը հայտարարեց, որ «նախագահները փոխվում են, գնալով վիճակը վատանում է, որովհետև ռեսուրսները օգտագործվում են մի քանի հոգու ֆինանսական աճի համար, երկրին օգուտ չկա»:  Նա ընդգծեց, որ քանի որ ոստիկաններին հայտնի չէր իրենց երթի ուղղությունը, ուստի ոստիկանները «չգիտեին որտեղ պրովոկացիա սարքեն, պրովոկացիան սարքեցին օպերայի մոտ»: Ամբաստանյալը հայտարարեց, որ իր տանը հայտնաբերված միջոցը նախատեսված է կենդանիներին անշարժացնելով բուժօգնություն ցույց տալու համար:

Ամբաստանյալ Լիպարիտ Պետրոսյանը հայտնեց, որ բերման ենթարկվելուց հետո ոստիկանապետն ասել է. «Պատասխան ես տալու՝ ամեն մի ոստիկանի թափած արյան համար»:

Իր հերթին ամբաստանյալը հակադարձեց. «Այսօրվա  իշխանությունը պատասխան է տալու մեր հարազատների թափած ամեն մի արցունքի կաթիլի համար»:

Ոստիկանապետի թեման շոշափվեց նաև ամբաստանյալ, բանակի փոխգնդապետ Վարդան Վարդանյանի ցուցմունքներում: Նա հայտնեց, որ ոստիկանապետը և համակարգի մի շարք այլ պաշտոնյաներ ծեծել են իրեն, մեդալները պոկել:

«Ոստիկանապետն անձամբ ինձ է պատասխան տալու»,- ասաց նա՝ հայտնելով, որ լսել է ոստիկանների խոսքերը՝ «տղուն սահմաններում կխփենք, կխելոքանա»:

Ըստ ամբաստանյալի՝ սկզբից մինչև վերջ սադրած միջոցառում է եղել, քննություն ընդհանրապես չի կատարվել: «Պետպատվերով չեն բուժում, բայց դատում են»,- ասաց Վարդան Վարդանյանը:

Ամբաստանյալ Սևակ Մնացականյանը հայտարարեց. «Սադրել են, բռնություն են գործադրել, ծեծը ստացել են»: Նրա տպավորությամբ՝ ոստիկանների նպատակը ոչ թե ձերբակալելն էր, այլ՝ «մարդակույտ սարքելը»:

Ըստ ամբաստանյալի՝ խուլիգանությունը որևէ կապ չունի իրենց հետ, նույն հաջողությամբ կարելի էր իրենց մեղադրել, ասենք, սեռական ոտնձգության մեջ:

«Պատրաստ ենք արժեքների հեղափոխության համար պայքարել և պայքարել մինչև վերջ»:  

Ամբաստանյալ Տիգրան Պետրոսյանն էլ գտնում է, որ «ադեկվատ պատասխան է եղել յուրաքանչյուր քայլի». Շանթ Հարությունյանին բրդել են, իրենք պաշտպանել են նրան բռնությունից: «Այս ամենը սարքոցի է»,- հավելեց ամբաստանյալը: