Փաստ ինֆո

56-ամյա Կոշկերյանը մինչև վերջերս Վարդաշենում բարեգործի համբավ ուներ, համենայնդեպս հարևանները գիտեին, որ նա 2008թ. հիմնադրել էր «Հուսո առագաստ» բարեգործական կազմակերպությունը, օգնել անապահով հարևաններից մի քանիսին` բժշկական օգնության հարցերով։

Մի անգամ էլ հարևանուհուց տեղեկացել է, որ նրա երկու որդիները հաշմանդամ են, ընտանիքն ապրում է սուղ միջոցներով, փոքր բնակարանում, ու խոստացել է օգնել նրան: Իսկ քանի որ օգնելու միջոց չի գտել՝ որոշել է անձամբ օգուտ քաղել առանց այդ էլ կարիքավոր իր հարևանուհուց:

Դրա համար նա նախ սուտ պատմություն է հորինել, թե իբր կարող է կազմակերպել նրանց պետական ծրագրով բնակարան ստանալը և նրա որդիների բուժման նպատակով Ֆրանսիա մեկնլը: Այս ամենի դիմաց նա 2 200 000 դրամ է պահանջել: Իսկ որպեսզի հարևանուհին ոչինչ չկասկածի, վերցրել է նաեւ նրա ու որդիների անձագրերի և հաշմանդամության կարգը հաստատող փաստաթղթերը։

Սակայն Կոշկերյանի նախանշած 1 տարվա ընթացքում ոչ բնակարանի հարցն է լուծվել, ոչ էլ՝ որդիների՝  ֆրանսիա մեկնելը։ Հարևանուհին սկսել է հետաքրքրվել, կասկածել, իսկ Կոշկերյանն ամեն անգամ մի պատճառաբանությամբ հորդորել է նրան էլի սպասել՝ մինչև որ մի օր կնոջ համբերությունը սպառվել է և նա դիմել է ոստիկանություն:

Այստեղ կատարված քննության արդյունքում Կոշկերյանին մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով` ուրիշի գույքը գաղտնի հափշտակելու դիտավորությամբ խոշոր չափերի վնաս հասցնելու համար:

Ավելի ուշ դատարանն էլ Գ.Կոշկերյանին մեղավոր է ճանաչել և դատապարտել ազատազրկման՝ 2 տարի ժամկետով, սակայն կիրառելով Հայաստանի Հանրապետության անկախության հռչակման 22-րդ տարեդարձի կապակցությամբ հայտարարված համաներման մասին որոշումը՝ ազատել է նրան նշանակված պատժից։