Փաստ ինֆո

ՀՀ-ի և ԼՂՀ-ի միջև մաքսակետի վերաբերյալ կետ Եվրասիական տնտեսական միության այսօր գորյություն ունեցող փաստաթղթերում չկա: Այս մասին այսօր կառավարության նիստի ավարտին հայռարարեց Էկոնոմիկայի նախարար Կարեն Ճշմարիտյանը:

Հիշեցնենք՝ երեկ ՌԴ վարչապետ Դմիտրի Մեդվեդևը ստորագրել է այդ կառույցին ՀՀ անդամակցության պայմանագիրը: Լրագրողների հարցին, թե ինչ ընթացակարգով է մեր երկիրը ստորագրելու պայմանագիրը և ինչ ժամկետնեում, նախարարը հստակ պատասխան չտվեց` նշելով, որ իր կարծիքով այդ հարցը պետք է կարգավորվի ներպետական ընթացակագերով: «Չեմ կարծում, թե դա մեկ կամ երկու օր հետո կլինի»,- ասաց նախարարը:

Կարեն Ճշմարիտյանին հայտնի չէ նաև, թե երբ այդ փաստաթղթին հավանություն կտան մյուս 2 գոծընկերները` Ղազախստանն ու Բելառուսը:

Անդրադառնալով այս գործընթացի տնտեսական կողմին՝ Կարեն Ճշմարիտյանը նշեց, որ ՌԴ նկատմամբ Արևմուտքի պատժամիջոցների խստացմամբ պայմանավորված՝ ռուսաստանյան շուկայում հայկական գյուղմթերքի իրացման ծավալների աճ է կանխատեսվում, հետևաբար, ըստ նախարարի, հարկ է մեծացնել արտահանման ծավալները:

«Այդ ուղղությամբ բավական աշխատանք է տարվում: Վարչապետը հատուկ խորհրդակցություն հրավիրեց և հանձնարարեց գյուղատնտեսության, էկոնոմիկայի նախարարություններին, որպեսզի բոլոր հնարավոր միջոցներով աջակցենք մեր տնտեսվարող սուբյեկտներին, որպեսզի իրենք կարողանան ՌԴ շուկայում ընդլայնել իրենց ապրանքների ցանկը և արտահանվող ապրանքների ծավալները: 57 անուն ապրանքները, որոնք գտնվում են պատժամիջոցների տակ, դրանցից 37-ը Հայաստանն արտահանում է ընդհանարպես, որից 31-ը՝ հենց Ռուսաստան: Մոտ 84.5 մլն դոլարի արտահանում է արվում, որից 67 մլն-ը՝ հենց ՌԴ»,- ասաց Կարեն Ճշմարիտյանը:

Իսկ թե ի՞նչ ազդեցություն կունենան պատժամիջոցները ՀՀ ներմուծվող ապրանքների վրա, Էկոնոմիկայի նախարարը չհստակեցրեց:

«Ժամանակ է պետք: Եթե գնում է ներմուծման փոխարինելիություն, դա նույնիսկ որոշ առումով ձեռնտու է մեր տնտեսվարողներին: Ինչ վերաբերում է այդ ապարանքները Հայաստան տարանցիկ անցնելուն, այդպիսի սահմանափակում չկա»,- ասաց նա: