Փաստ ինֆո

Օրեր առաջ հայ-ադրբեջանական շփման գծում ստեղծված իրավիճակի շուրջ «Ժողովուրդ»-ը զրուցել է ԼՂՀ վարչապետ Արա Հարությունյանի հետ:

ԼՂՀ վարչապետն իր խոսքում ասել է, որ այս պահին սահմանի վրա իրավիճակը հանգիստ է՝ հավելելով, որ իրավիճակը հանգիստ է ոչ միայն համեմատած այս օրերի, այլև՝  մյուս ժամանակներում սահմանում տիրող իրավիճակի հետ:

Լրատվամիջոցի հարցին, թե կարելի՞ է ասել, որ Հայաստանի, ՌԴ-ի և Ադրբեջանի նախագահների հանդիպումը տվել է իր արդյունքը, Արա Հարությունյանը պատասխանել է.

«Ոչ միայն Սոչիի եռակողմ հանդիպումը: Այո, այն իր արդյունքը տվել է, բայց նաև մեր պաշտպանության բանակի կողմից տրված պատասխանն է ստիպել հակառակորդին մեղմացնել իրավիճակը սահմանի վրա: Երկու գործոններն էլ դեր են խաղացել»:

Անդրադառնալով սահմանին հետագա լարված իրավիճակի հարցին, ինչպես նաև՝ Ադրբեջանի պաշտպանության նախարարի կողմից հնչեցրած հոխորտանքներին, թե «Հայաստանը վերացնելու է», ինչպես նաև այն հանգամանքին, որ դա արձագանք էր ՀՀ Նախագահի կողմից բալիստիկ հրթիռների հիշատակությանը, ԼՂՀ վարչապետն ասել է, որ մեր պաշտպանության բանակն ամեն օր ու ամեն վայրկյան սպասում է նոր լարումների ու պատրաստ է ցանկացած պահի կարգավորել դրանք: Ա.Հարությունյանը նաև շեշտել է, որ մեր խաղաղությունը կախված է հայոց բանակի մարտունակությունից և վերջին դեպքերն ապացուցեցին, թե որքան հզոր, ամուր ու մարտունակ է մեր բանակը:

Անդրադառնալով այն հանգամանքին, որ լարված օրերին շատերը սահման մեկնեցին, ոմանք էլ հայտարարեցին, թե պատրաստ են բանակի կողքին լինելու, լրատվամիջոցը Ա.Հարությունյանից փորձել է ճշտել, թե ըստ վարչապետի՝ բանակն այսօր ի վիճակի չէ՞ միայնակ պայքարել ադրբեջանական ագրեսիայի դեմ, արդյոք կա՞ աջակցող ջոկատների կարիք: Ի պատասխան վարչապետն ասել է, որ ինքը միանշանակ կարող է հայտարարել, որ հակահարվածը տրվել է միայն բանակի անձնակազմի՝ հիմնականում ժամկետային զինծառայողների կողմից:

Հոդվածն ամբողջությամբ կարող եք կարդալ «Ժողովուրդ»  օրաթերթի` 14.08.2014թ. համարում: