Փաստ ինֆո

«Սեւանն առավելագույն ուշադրության կարիք ունի, եւ դրա ջուրը չափից շատ վատնելն անթույլատրելի է»,- այսօր գործադրի նիստում հայտարարեց բնապահպան, «Հանուն կայուն մարդկային զարգացման» ՀԿ-ի նախագահ Կարինե Դանիելյանը` մեկնաբանելով կառավարության քննարկմանը ներկայացված հարցը` Սևանա լճից ջրառի ավելացման մասին:

Ի պատասխան՝ վարչապետ Հովիկ Աբրահամյանն էլ հայտարարեց, թե Սևանի խնդիրները կառավարության մշտական ուշադրության կենտրոնում են, բայց կառավարությունը չի կարող մոռանալ գյուղացիների ոռոգման կարիքների մասին:

Եվ, այդուհանդերձ, կառավարությունը հաստատեց Սևանից վերցվող ջրի ծավալը 240-ի փոխարեն 270 մլն քմ թույլատրելու որոշման նախագիծը: Հիշեցնենք՝ Սևանա լճի մասին օրենքով լճից ջրառի տարեկան առավելագույն ծավալը սահմանված է 170 մլն խմ: Բայց գարնանը կառավարությունն ընթացիկ տարվա ջրառի ծավալը սահմանեց առավելագույնը 240 մլն խմ՝ ոռոգման ջրի անբավարարության պատճառով: Իսկ 2 ամիս առաջ բնապահպանների հետ կառավարությունում տեղի ունեցած քննարկումներից հետո շեմն ավելի բարձրացվեց` մինչև 270 մլն խմ-ի:

Այսօր հարցի քննարկման ժամանակ ՀՀ կառավարությանն առընթեր ջրային տնտեսության պետական կոմիտեի ղեկավար Անդրանիկ Անդրեասյանը հայտարարեց, որ Սեւանից ջրառը հնարավորինս նվազեցնելու համար Արարատյան դաշտավայրում 2 պոմպակայաններ են մոբիլիզացվել՝ Ռանչպարի եւ Մխչյանի, որոնք գետերից 54 միլիոն խմ ոռոգման ջուր կհասցնեն գյուղատնտեսություններին:

Հովիկ Աբրահամյանն էլ հիշեցրեց, որ կառավարությունը խնդիր է դրել Արարատյան դաշտի ստորգետնյա ջրերը խնայելու: Եվ,այդուհանդերձ, խնայողության փոխարեն նախատեսված 112 արտեզյան խորքային հորերի փոխարեն այստեղ 119 հոր է վերաբացվել:

«Սկզբնապես մենք որոշել էինք բացել 112-ը, այնուհետեւ ես հրամայեցի ավելացնել եւս 7-ը: Մինչեւ ոռոգման սեզոնի ավարտը այս հորերից ջուր մղելու համար կպահանջվի  1,5 միլիարդ դրամ (3,66 միլիոն դոլար):

Այս ծախսերը կառավարությունը նույնպես իր վրա է վերցրել: Մենք այս ամենն արել ենք Սեւանի ջուրը խնայելու համար: Գյուղացիներին էլ չենք կարող անջուր թողնել: Այդ պատճառով էլ ստիպված էինք ավելի շատ ջուր վերցնել, քան սովորաբար: Տարին չորային է, բնականաբար, ոչ ոք դա չէր ցանկանում»,- ասաց Վարչապետ Հովիկ Աբրահամյանը: