Փաստ ինֆո

Հայ գյուղացիները հրաժարվում են գնել կառավարության առաջարկած հացահատիկի էլիտար սերմերը: Այս մասին այսօր կառավարության նիստի ընթացքում հայտնեց Գյուղատնտեսության նախարար Սերգո Կարապետյանը:

Նրա խոսքով՝ 2014թ. հուլիսի 31-ի դրությամբ ՀՀ մարզերում իրացվել է 817.185 տոննա գարու, 4.62 տոննա եգիպտացորենի, 41.467 տոննա առվույտի և 125.45 տոննա կորնգանի սերմացու այն դեպքում, երբ 2014 թվականի գարնանացանի համար հանրապետություն է ներկրվել 1906.3 տոննա գարնանացան գարու, 168.35 տոննա կապույտ առվույտի, 169.96 տոննա կորնգանի և 23.44 տոննա եգիպտացորենի սերմացու, իսկ տեղական սերմարտադրողներից գնվել է 150 տոննա էլիտային վերարտադրության գարնանացան գարու սերմացու:

Հետևաբար, չիրացված սերմացուի խնդրի լուծման համար նախարարն առաջարկում է այն հանձնել մարզպետարաններին, որպեսզի վերջինները պահեն և 2015 թվականի գարնանը նույն ծրագրի շրջանակներում վաճառեն գյուղացիներին:

Հիշեցնենք՝ սա հենց այն ծրագիրն է, որն իրականացվում է 2011թվականից ի վեր և կառավարության խոստման համաձայն՝ էլիտար սերմերը պետք է խոստումնալից վերարտադրություն ապահովեին:

Սակայն սպասված բերքը կամ չաճեց, կամ եղանակը փչացրեց դաշտերը, իսկ գյուղացիները, որոնց մեծ մասը կառավարության առաջարկած սերմերը գնել էին բանկերից վերցրած վարկով, կամ վաճառել են իրենց տուն-տեղը` պարտքը վերադարձնելու համար, կամ մինչ օրս էլ դատարաններում փորձում են արդարության հասնել:

Ի դեպ, նշենք, որ կառավարության նիստում արված նախարարի առաջարկը վարչապետ Հովիկ Աբրահամյանին այնքան էլ չոգևորեց:

«Հիմա մենք ի՞նչ ենք անում, տալիս ենք մարզպետարաններին, որ ի՞նչ անեն: Հիմա իրենք իրավունք ունե՞ն բաժանեն սերմը: Բա որ էդ պահեն, կարո՞ղ են լավ պահեն, որ որակը պահպանեն: Իմ կարծիքով՝ ճիշտ կլինի, որ հետևեք, ու այդ սերմը հիմա մարզպետարանները բաժանեն գյուղացիներին»,- առաջարկեց Հովիկ Աբրահամյանն ու անմիջապես էլ հրահանգեց. «Եթե պիտի մնա փչանա, ավելի լավ է տանք գյուղացիներին, գյուղացիներն օգտագործեն»: