Փաստ ինֆո

Քրեական հեղինակություն Թևոսիկի եղբոր սպանությունը պատվիրելու և այն իրականացնողին սպանելու համար մեղադրվող Իսրայել Սարգսյանի փաստաբան Արսեն Սարդարյանը պատրաստվում է դիմել Մարդու իրավունքների եվրոպական դատարան` բողոքարկելու իր պաշտպանյալի նկատմամբ, իր խոսքով, «առանց հիմնավորման» կիրառված կալանքի որոշումը: Այս մասին նա հայտնեց «Փաստինֆո»-ի հետ զրույցում` հավելելով, որ այս պահին դեռ խնդիր ունեն սպառել ներպետական դատական ատյանները:

«Գիտեք` մեր երկրի դատական համակարգը ինչպես է աշխատում. Առաջին ատյանի դատարանը կալանքի որոշումը կայացնում է, Վերաքննիչն ու Վճռաբեկը նույնիսկ չեն էլ նայում, ուղղակի պետք է այս ամենն ապահովվի, որ ԵԴ տանենք»,- ասաց փաստաբանը:

Նշենք, որ Իսրայել Սարգսանի նկատմամբ կալանքի որոշումը կայացվել էր 6 ամիս առաջ, իսկ օգոստոսի 3-ին այն երկարաձգվել էր ևս 2 ամսով:

Հիշեցնենք`  սույն թվականի հունվարի 27-ին Արթուր Սաֆարյանի սպանության փաստի առթիվ հարուցված քրեական գործի շրջանակներում ոստիկանությունը կալանավորել էր Իսրայել Սարգսյանին և Տիգրան Ասատրյանին:

Ոստիկանների առաջ քաշած վարկածի համաձայն՝ Իսրայել Սարգսյանը Մովսես Ներսիսյանին պատվիրել է կատարել Արթուր Սաֆարյանի սպանությունը, իսկ դրանից հետո սպանել էր նաև Մոսոյին` հետքերը մաքրելու համար:

Ի դեպ, վերջինի դիակն առ այսօր չի գտնվել, թեև դրա որոնման աշխատանքներում ներգրավվել էին նույնիսկ սուզակներ ու փրկարարներ, ովքեր օրեր շարունակ որոնողական աշխատանքներ էին կատարում դիտահորերում, քանի որ նախաքննական վարկածի համաձայն՝ սպանությունից հետո Իսոն իր ավտոմեքենայով Մոսոյի դին տեղափոխել է Քանաքեռավանի դաշտ և նետել կոյուղու դիտահորը:

Ի դեպ, օրերս մամուլում տեղեկություններ հայտնվեցին այն մասին, որ իրավապահները փորձաքննություն են կատարել, որի արդյունքում ապացուցված են համարել, որ Մոսոյի դին քայքայվել է: Ըստ այդմ` սատկած շան դիակի ամենապինդ հատվածում՝ գլխում, սարքավորում են տեղադրել և այն իջեցրել Քանաքեռավանի կոյուղու դիտահորը: Որոշ ժամանակ անց սարքից արձակվող ազդանշանը դարարել է, որից իրավապահները ենթադրել են, որ կենդանու դիակը քայքայվել է կոյուղու մեջ, ինչին էլ նրանց առիթ է տվել ենթադրելու, որ Մոսոյի դին ևս կարող էր քայքայված ու անհետացած լինել:

Մեր հարցին, թե որքանով են իրականությանը համապատասխանում նման փարձաքննության մասին լուրերը, Իսրայել Սարգսյանի փաստաբան Արսեն Սարդարյանը պատասխանեց. «Ես նման որևէ իրավական բան չգիտեմ: Բացի այդ, ինձ արգելված է որևէ տեղեկություն հայտնել»:

Բանն այն է, որ երբ ապրիլին քրեական գործի նախաքննությունը ոստիկանությունից փոխանցվեց ՀՀ ազգային անվտանգության ծառայության քննչական վարչություն: Նոր նախաքննական մարմինը փաստաբաններից ստորագրություն պահանջեց՝ նախաքննական գաղտնիքը չբացահայտելու համար, որով գործի քննության ընթացքը, փաստորեն, գաղտնի դարձավ:

«Բայց ասեմ, որ երբ Իսոյին ձերբակալել են, ասել են 2-3 օր առաջ սպանություն է եղել: Այն ժամանակ պետք է դիակը գտնեին, ոչ թե 6 ամիս սպասեին ու հիմա է լհայտարարեն, թե դիակը քայքայվել է»,- ասաց փաստաբանը` ավելացնելով. «Եթե 6 տարի պահեին կալանքի տակ, կարող էին նույնիսկ մասնագետների կարծիքն ստանալ, որ 6 տարի դիակը չի պահպանվում»,- մեզ հետ զրույցը եզրափակեց փաստաբանը: