Փաստ ինֆո

Ռուսաստանի, Հայաստանի և Ադրբեջանի Նախագահներն այսօր Սոչիում կայացած հանդիպման ժամանակ արձանագրել են, որ ղարաբաղյան հակամարտությունը կարող է կարգավորվել միայն խաղաղ ճանապարհով: Այս մասին հայտնում է ռուսական Interfax գործակալությունը:

«Ես հաճույքով արձանագրում եմ, որ Ադրբեջանի Նախագահն ուշադրություն հրավիրեց խնդիրը խաղաղ ճանապարհով լուծելու անհրաժեշտության վրա, և Դուք (ИФ- Հայաստանի Նախագահ Սերժ Սարգսյան) այդ մասին այժմ ասացիք: Սա իրականում ամենագլխավորն է, քանի որ մարդկային զոհերից առավել մեծ դժբախտություն չկա»,- եռակողմ հանդիպման ժամանակ ասել է ՌԴ Նախագահ Վլադիմիր Պուտինը:

Ըստ աղբյուրի՝ Ռուսաստանի ղեկավարը կոչ է արել իր գործընկերներին՝ խնդիրը քննարկել նեղ կազմով, այնուհետև՝ պատվիրակությունների անդամների մասնակցությամբ:

Ըստ ՌԴ Նախագահի պաշտոնական կայքէջի՝ Վլադիմիր Պուտինը, հանդիպման սկզբում դիմելով Հայաստանի և Ադրբեջանի Նախագահներին, ընդգծել է, որ, բնականաբար, նման խնդիրների, ղարաբաղյան հակամարտության լուծման միջազգային տարբեր ձևաչափեր կան: «Անկածկած, մենք  հարգանքով ենք վերաբերվում միջազգային բոլոր ձևաչափերին և մեր գործընկերների հետ կշարունակենք աշխատել»,-ասել է ՌԴ Նախագահը:

Վ.Պուտինը հավելել է նաև. «Սակայն, ելնելով այն հանգամանքից, որ մեր հարաբերությունները յուրահատուկ են և հատուկ մտերիմ, ունեն խորը նախապատմություն, ինչը մեզ թույլ  է տալիս անկեղծորեն մտքեր փոխանակել այն մասին, թե որ կետում ենք գտնվում և ինչ պետք անենք՝ անցյալից մեզ բաժին հասած բոլոր խնդիրների կարգավորման հարցում առաջ շարժվելու համար: Ամեն դեպքում՝ կարծում եմ, որ սա օգտակար է: Եվ ես շատ ուրախ եմ այսօր ձեզ հետ հանդիպելու և այս բոլոր թեմաներով զրուցելու հնարավորության համար»,-նշել է ՌԴ Նախագահը:

Ադրբեջանի Նախագահն էլ իր հերթին մասնավորապես հույս է հայտնել, որ Վ.Պուտինի անձնական մասնակցությունը նոր զարկ կտա բանակցային գործընթացին: Նա նշել է, որ Մինսկի խումբը՝ ի դեմս համանախագահների, աշխատում է, փորձում մոտեցնել կողմերին, սակայն դա այնքան էլ չի հաջողվում: «Այդ իսկ պատճառով ես կարծում եմ, որ Ռուսաստանը, որպես մեր մտերիմ բարեկամ, գործընկեր և հարևան, կարգավորման գործընթացում իհարկե հատուկ դեր ունի: Հուսով ենք, որ մոտակա ժամանակներում բանակցությունների միջոցով խաղաղ ճանապարհով մենք կգտնենք այնպիսի լուծում, որը  կհամապատասխանի միջազգային իրավունքի և՛չափորոշիչներին, և՛ սկզբունքներին, ինչպես նաև կհամապատասխանի արդարությանը»,-նշել է Ադրբեջանի Նախագահը:

Հայաստանի Նախագահ Սերժ Սարգսյանը ևս բարձր է գնահատել ՌԴ Նախագահի այս նախաձեռնությունը: «Մենք գտնում ենք, որ հակամարտությունն իրականում կարելի է լուծել, այն պետք է լուծել փոխզիջումային հիմքի և Մինսկի խմբի համանախագահների առաջարկած սկզբունքների հիման վրա: Ադրբեջանական կողմմ անընդհատ հղում է անում ՄԱԿ-ի չորս բանաձևերի վրա, սակայն ես հռետորական հարց ունեմ պարոն Ալիևին, թե այդ բանաձևերի ո՞ր կետն է կատարել Ադրբեջանը: Բանաձևի կետերի միակ կատարողը Հայաստանն է, որն օգտագործել է իր ազդեցությունը, որպեսզի դադարեցնի մարտական գործողությունները:

Եվ եթե մենք վերադառնանք 90-ականների սկզբի իրադարձություններին, ապա ես կարծում եմ, որ մի կողմից դա լավ կլինի, իսկ մյուս կողմից միգուցե ինչ-որ բան ձգձգվի: Լավ կլինի, որովհետև այն ժամանակ մենք հանգեցինք նրան, որ հակամարտությունը չունի ռազմական լուծում: Իսկ եթե մենք կրկին սկսենք իրար մեղադրել, կարծում եմ, որ հակամարտությունը դեռ երկար ժամանակ լուծված չի լինի»,-ընդգծել է Հայաստանի Նախագահը: