Փաստ ինֆո

«Հին Էրիվան Հոլդինգ» ՍՊԸ-ի սնանկության գործով դատարանն այսօր մերժեց  «Հին Էրիվանի» սեփականատեր Մանվել Տեր-Առաքելյանի ներկայացուցիչ Դավիթ Դանիելյանի ինքնաբացարկի միջնորդությունը: Ըստ փաստաբանի,  իր վստահորդը բազմիցս առիթներ է ունեցել կասկածելու գործով նախագահող դատավոր Ալեքսեյ Սուքոյանի անաչառությանն ու անկողմնակալությանը:

Այսօրվա դատական նիստի  երկու ժամվա ընթացքում «Հին Էրիվանի» ներկայացուցիչ Դավիթ Դանիելյանը ապարդյուն փորձում էր պարզել, թե որտեղից  և ինչ հաշվարկների հիման վրա  է գոյացել «Յունիբանկին» «Հին Էրիվանի» պարտքի գումարը՝  մոտ 8 մլն դոլարը՝ որքան է կազմում, ըստ «Յունիբանկի», մայր գումարը և որքան՝ տոկոսները:  Բանկի ներկայացուցիչը տալիս էր անորոշ պատասխաններ, արդյունքում ստացվեց, որ հարցերը մնացին անպատասխան:

Այսօրվա նիստում Մանվել Տեր-Առաքելյանին հնարավորություն չտրվեց խնդրի առնչությամբ հանդես գալ հայտարարությամբ՝ դատավորը պատճառաբանեց՝ «Դուք իրավունք չունեք»:

Մ.Տեր-Առաքելյանն իր  հայտարարությունը հրապարակեց լրագրողների հետ զրույցում: 

«Հին Էրիվանի» սեփականատերը տարակուսանք հայտնեց  «Հին Էրիվանի» հետ ջենթլմենական համաձայնության մասին «Յունիբանկի» ներկայացուցչի հայտարարության առնչությամբ: «Ի՞նչ ջենթլմենային համաձայնություն» այն դեպքում, որ բանկը առանց համաձայնեցնելու, ինքնագլուխ կերպով «Հին Էրիվանի» հաշիվներից «քաշել էր» 32.5 մլն դրամ  և «Հին Էրիվանը» գցել անբարեխիղճ վճարողների «սև ցուցակ»:

Մ.Տեր-Առաքելյանն ընդգծեց, որ դա արվել է այն բանից հետո, երբ  «Հին Էրիվանը»  սկսել է համագործակցություն նոր բանկի՝ ՎՏԲ-ի հետ՝  բանկն արդեն  հինգուկես մլն դոլար էր փոխանցել «Հին Էրիվանի» հաշվեհամարին, սակայն «Հին Էրիվանի»՝ «սև ցուցակում» հայտնվելուց հետո՝ գումարները հետ էին վերցվել:   

Հիշեցնենք, որ դատարանը «Հին Էրիվան Հոլդինգ» ՍՊԸ-ի կողմից դատարան ներկայացված գրավոր առարկությունների հիման վրա պետք է քննի ընկերության դեմ պահանջ ներկայացրած 15 պարտատերերի, այդ թվում՝ «Յունիբանկ» ՓԲԸ-ի կողմից ներկայացված 3,103,867,029.42 ՀՀ դրամ պահանջի օրինականության, հիմնավորվածության, չափի և ապահովվածության հարցերը: