Փաստ ինֆո

2014թ.-ի հունվար-հունիս ամիսներին միջազգային ուղևորահոսքերի բացասական մնացորդը՝ հանրապետությունից մեկնումների թվի գերազանցումը հանրապետություն ժամանումների թվին, նախորդ տարվա նույն  ժամանակահատվածի  համեմատ  պակասել  է 9,1 հազարով կամ 9,6 %-ով և կազմել 85,9 հազար մարդ:

Այս մասին վկայում է ՀՀ ազգային վիճակագրական ծառայության միջազգային սահմանահատումների վերաբերյալ հրապարակած տվյալների հիման վրա Տարածքային կառավարման նախարարության Միգրացիոն պետական ծառայության կատարած վերլուծությունը:

Ընդ որում՝ երկրորդ եռամսյակում միջազգային ուղևորահոսքերի բացասական մնացորդը կազմել է 54 հազար մարդ՝ նախորդ տարվա երկրորդ եռամսյակի 57,9 հազարի դիմաց:

2014թ.-ի հունվար-հունիս ամիսներին ուղևորահոսքերի ընդհանուր ծավալը նախորդ տարվա նույն  ժամանակահատվածի  համեմատ  ավելացել է  303,3 հազար մարդով  կամ  15,6%-ով և կազմել 2 մլն 242,3 հազար մարդ:

Օդային տրանսպորտով սահմանը հատած ուղևորների տեսակարար կշիռը ուղևորահոսքերի ընդհանուր ծավալում կազմել է 40,6%՝ նախորդ տարվա 38,2%-ի դիմաց:

Տարվա առաջին կիսամյակում օդային տրանսպորտով Հայաստանից մեկնել է 477 հազար 766 մարդ, ժամանել՝ 433 հազար 170: Այսինքն՝ հանրապետությունից մեկնումների թիվը 44 596-ով գերազանցել է հանրապետություն ժամանումների թվին:

Ավտոմոբիլային տրանսպորտով Հայաստանից մեկնել է 678 հազար 404 մարդ, ժամանել՝ 637 հազար 972: Մեկնումների թիվը 40 432 -ով գերազանցել է ժամանումների թվին:

Երկաթուղային տրանսպորտով Հայաստանից մեկնել է 7 897 մարդ, ժամանել՝ 7 հազար 58: Մեկնումների թիվը 839-ով գերազանցել է ժամանումների թվին: