Փաստ ինֆո

Անցյալ տարվա նոյեմբերի 5-ին Երևանի կենտրոնում տեղի ունեցած դեպքերի  գործով այսօրվա դատական նիստում  ամբաստանյալ,  «Ցեղակրոն» կուսակցության առաջնորդ Շանթ Հարությունյանը նորից բարձրաձայնեց ռուսական ԿԳԲ-ի  հայաստանյան  գործակալների մասին: Նրանց շարքին Շ.Հարությունյանը դասեց Գեորգի Վանյանին, ով, նրա գնահատմամբ, Հայրենիքի դավաճան է: Այլ բան է, որ վերջինս  փորձեր պաշտպանել  ադրբեջանցի դիվերսանտների իրավունքները, սակայն անընդունելի է նրանց  պատանդ համարելու մասին նրա  հայտարարությունը:

Շ.Հարությունյանը նշեց, որ ինքը կողմ է Ադրբեջանի հետ հարևանությանը ու արդարացի համակեցությանը, սակայն մի պայմանով՝  պետք է չեղյալ համարվի 1921 թ. ռուս-թուրքական պայմանագիրը և Հայաստանի ու հարևանների միջև կնքվեն նոր պայմանագրեր՝  Ռուսաստանի զրոյական մասնակցությամբ, այդ դեպքում Ռուսաստանն, ըստ նրա,  չի կարողանա  «Ադրբեջանին շան նման քսի տալ Հայաստանի վրա»:

Ամբաստանյալ Վարդան Վարդանյանը համաձայն է  հայտնված այն  տեսակետների հետ, որ գործարար  Լևոն Հայրապետյանի ձերբակալությունը  ռուսական ու ադրբեջանական ԿԳԲ-ի   լարած թակարդն է՝ նպատակն է վարկաբեկել  Հայրենիքից դուրս գտնվող հայ բարերարներին, որպեսզի նրանք  չկարողանան  օգնել Հայրենիքին:

Մշակութային դիվերսիայի  թեման շոշափեց  ամբաստանյալ Ավետիս Ավետիսյանը՝  «նոր սերունդը զրկվում  է արժեքներից ու սրբություններից, կաթիլ  առ կաթիլ  թունավորվում է, այդ թվում՝  սերիալների շնորհիվ: Արդյունքում դաստիարակվում է առանց սրբության սերունդ: Ուստի նա  կոչ արեց  հայ տղամարդկանց   պայքարել դրա դեմ՝ ժամանակն ու իշխանությունը մեր դեմ են աշխատում»:

Ամբաստանյալ Արմեն Հովհաննիսյանը բարձրաձայնեց Շանթ Հարությունյանի հայտարարած արժեքների հեղափոխության մասին:  Մի կողմից ժողովուրդը հայտնվել է  «ողորմելի,  ստրկական վիճակում»,  առկա են սոցիալական խնդիրներ՝ գործազրկություն, մյուս կողմից՝  առկա է ծայրահեղ անտարբերություն արժեքների նկատմամբ՝ մարդիկ լքում են Հայրենիքը, հեռուստատեսությունը,  կինոն  ու թատրոնը՝  պղծվում: Դրա տրամաբանական շարունակությունն է, ըստ ամբաստանյլի, այն, որ իրենք  մեղադրվում են «սովորական անտաղանդ հանցագործության մեջ»:  Նա ընդգծեց, որ պետական մեքենան ոտնահարել է սրբությունները, այսպիսի պետությունը չի կարող ոչինչ սպասել բացի ատելությունից, պոռթկումը կլինի,  և կվարկաբեկվի այն դատավճիռը, որ կկայացվի իրենց դեմ  ու իրենք կհամարվեն  արդարացված: Ամբաստանյալը վստահ է, որ մեղադրողը նույնպես ներքուստ համակրում է իրենց, քանի որ հնարավոր չէ, որ  մտահոգված չլինի սեփական  երեխաների ճակատագրով:

Ամբաստանյալ Ալեք Պողոսյանը բարձրաձայնեց անհեթեթության մասին՝ Երևանում կա Գարեգին Նժդեհի հրապարակ, որտեղ տեղադրված է նրա քաղաքական հակառակորդ Սուրեն Սպանդարյանի արձանը, ինչը ոչ այլ ինչ է, քան Նժդեհին ստորացնելու փորձ:

Այսօրվա դատական նիստում հարցաքննվեցին գործով վեց տուժողներ: Ոստիկան Ազիզ Միրզոյանը հայտնեց, որ եղել են պայթյուններ, «եղել է մուխ», մի քանի վայրկյան անտեսանելի է եղել, արցունք է լցվել աչքերի մեջ, հետո բացելով աչքերը՝ տեսել է խառնաշփոթ և քաշքշուկ:

Տուժող Ռազմիկ Խառատյանը աչքերն են մրմռացել, եղել են պայթյուններ, ոստիկաններին ուղղված հարվածներ,  կար դիմադրություն ոստիկանների օրինական պահանջներին: Արդյոք պողոտայի երթևեկելի մասից մայթ բարձրանալը օրինակա՞ն պահանջ է հարցին ի պատասխան տուժող ոստիկանը հղեց օրենքի դրույթը  « հասարակական վայրերը ոչ նպատակին օգտագործելու» մասին: Հայհոյանքներ եղել են, ասաց նա, բայց հայհոյողները ամբաստանյալները չէին:
Քաղաքացիական հագուստով անձի մասին  ասում էին՝ միլիցիա է, խփեք, մինչ ոստիկանները փորձում էին պողոտայի երևթևեկելի մասից դեպի մայթ ուղդել  ցուցարարներին,  վերջիններս  վերցնելով  փայտերը,  հարվածում էին ոստիկաններին: «Ես հարված եմ տեսել գլխին»,- ասաց նա:

Ոստիկան Հարություն Գրիգորյանի շալվարի փողքերն ու կոշիկներն են այրվել, աչքերը մրմռացել, ականջը վնասվել, տեսել է ինչպես երկու քաղաքացիական հագուստով ոստիկանի ծեծում էին, նրանցից   մեկին հարվածում էին անգամ ընկած վիճակում:

Արթուր Վարդգեսյանը ևս ասաց, որ քաղաքացիական հագուստով անձի վերաբերյալ ասացին՝ միլիցիա է, խփեք, գցեցին գետնին սկսեցին հարվածել, «նկատեցի, որ գլուխն արյունոտված էր»:  Պայթյունների հետևանքով ոստիկան տուժողի աչքերն են մրմռացել, «այդ օրը բոլորի աչքերն են մրմռացել»:

Ոստիկան Ազատ Հովսեփյանը նշեց, որ փորձում էր կանխել ամբաստանյալ Ավետիս Ավետիսյանի անկարգությունները,  նա պայթուցիկ էր գցել ոտքերի տակ: Ի դեպ, ոստիկանը, Շանթ Հարությունյանի անչափահաս որդուն՝ Շահեն Հարությունյանին բերման է ենթարկել, նա հերքեց, որ ծեծի է ենթարկել անչափահասին: