Փաստ ինֆո

Դատախազը պահանջում է 7-ական տարվա ազատազրկման դատապարտել Ոստիկանության Երևան քաղաքի վարչության Նոր Նորք բաժնի անչափահասների գործերով բաժանմունքի պետին ու տեսուչին, ովքեր մեղադրվում են համբուրված անչափահասի հորից կաշառք պահանջելու մեջ:

Այսօրվա դատական նիստում մեղադրող դատախազը հանդես եկավ մեղադրական ճառով` հիմնավորված համարելով կաշառք պահանջելու եւ անչափահասին ապօրինի ազատությունից զրկելու համար ամբաստանյալներին առաջադրված մեղադրանքը: Քրեական գործի նյութերի համաձայն` անչափահասներ Կարինեն և Տիգրանը, (անունները փոխված են)  տանը մենակ լինելով, համբուրվել են: Հետագայում անչափահաս տղան և նրա հայրը բաժին են հրավիրվել, որտեղ ոստիկանները նրանց «բացատրել են», թե անչափահասի հետ համբուրվելը քրեորեն հետապնդելի արարք է, իսկ գործին ընթացք չտալու համար տղայի հորից  պահանջել են 2000 ԱՄՆ դոլար կաշառք` սպառնալով հակառակ դեպքում քրեական հետապնդում սկսել:

Իսկ մինչ անչափահասի հայրը կհայթայթեր պահանջված գումարը` Սամվել Հակոբյանը և Ֆելիքս Մկրտչյանը, անցնելով իրենց պաշտոնեական լիազորությունները, ավելի քան 8 ժամ ապօրինի ազատությունից զրկել են անչափահասին` նրան պահելով ոստիկանության բաժնում: Տղային բաց են թողել միայն այն բանից հետո, երբ պարզել են, որ հայրը  չի կարող այդ օրը բերել պահանջված կաշառքը: Իսկ փետրվարի 6-ին, երբ հայրն ի վերջո հայթայթել է պահանջած գումարի մի մասն ու այն հանձնել Սամվել Հակոբյանին, հենց տեղում` նրա աշխատասենյակում էլ վերջինը բռնվել է ՀՀ ԱԱԾ աշխատակիցների կողմից:

Մեղադրողը նաև նշեց, որ ամբաստանյալները, հանդիսանալով պետական իրավապահ մարմնի ներկայացուցիչներ և կոչված լինելով պայքարել հանցագործությունների և հատկապես կոռուպցիոն դրսևորումների դեմ, իրենք են գնացել հանցավոր ճանապարհով և գործի բացահայտումից հետո էլ զղջալու փոխարեն խուսափել են քննությանն աջակցելուց և տված ցուցմունքներով փորձել են խեղաթյուրել իրականությունը: Գործով ամբաստանյալների պատասխանատվությունը մեղմացնող և ծանրացնող հանգամանքներ ձեռք չեն բերվել:

Նոր Նորքի բաժնի անչափահասների գործերով բաժանմունքի պետ, ոստիկանության մայոր Սամվել Հակոբյանին մեղադրանք է առաջադրվել՝ ՀՀ քրեական օրենսգրքի 311-րդ հոդվածի 3-րդ մասի 1-ին, 2-րդ, 3-րդ կետերով և 309-րդ հոդվածի 1-ին մասով, իսկ Ֆելիքս Մկրտչյանին, բացի թվարկվածներից, նաև 34-178-րդ հոդվածի 2-րդ մասի 1.1 և 5-րդ կետերով:
Տուժողն ավելի ներողամիտ գտնվեց. նա  պնդեց իր նախաքննական ցուցմունքները և դատարանին խնդրեց ամբաստանյալների նկատմամբ մեղմ գտնվել:

Հաջորդ նիստը կկայանա սեպտեմբերի 11-ին, որի ժամանակ պաշտպանական կողմը հանդես կգա պաշտպանական ճառով: