Փաստ ինֆո

Շախմատի Հայաստանի տղամարդկանց հավաքականը հաղթական տրամադրությամբ է մեկնում Նորվեգիայի Տրոմսյո քաղաք, որտեղ օգոստոսի 1-ին մեկնարկելու է Համաշխարհային 41-րդ օլիմպիադան: Օդանավակայան գնալուց առաջ «Փաստինֆո»-ին տված բացառիկ հարցազրույցում այդ մասին հայտարարեց մեր թիմի գլխավոր մարզիչ գրոսմայստեր Արշակ Պետրոսյանը:

-Նախապատրաստական միակ հավաքն անցկացրել եք Աղվերանում: Ինչպե՞ս ընթացավ այն:

-Առաջնորդվեցինք վաղուց փորձված ծրագրով՝ շախմատային տեսական պարապմունքները համադրելով ֆիզիկական պատրաստականության բարելավմանը միտված աշխույժ խաղերով: Սովորաբար, տղաներն օրվա առաջին կեսին ֆուտբոլ էին խաղում կամ այցելում լողավազան, իսկ երեկոյան պարապմունքներն ամբողջությամբ նվիրում էինք շախմատին: Առհասարակ, նախընտրում ենք զբաղվել խաղային տարբեր մարզաձեւերով, բայց այս անգամ առաջին տեղում ֆուտբոլն էր: Տղաները հաճույքով էին խաղում նաեւ սեղանի թենիս:

-Աշխարհի առաջնության տպավորության տա՞կ էին:

-Միգուցե (ծիծաղում է): Եվ ասեմ, որ երբեմն լուրջ բանավեճ էր ծավալվում Բրազիլիայում անցկացված ստուգատեսի շուրջ: Մասնակից թիմերի վերաբերյալ տղաների նախասիրությունները տարբերվում են: Մի մասը եվրոպական հավաքականների երկրպագու է, մյուսներն էլ հավանում են Բրազիլիայի եւ Արգենտինայի թիմերին: Ճիշտ է, այս անգամ բրազիլացիներն ուրախանալու տեղիք չտվեցին:

-Ինչպե՞ս եք գնահատում մեր շախմատիստների մարզավիճակը:

-Հիմա դժվար է խոսել այդ մասին: Դրա վերաբերյալ ճշգրիտ պատկերացում կարելի է կազմել միայն մեկնարկային մի քանի տուրից հետո: Այս պահին կարելի է ասել, որ բոլորն էլ նորմալ մարզավիճակում են, մնացածը կերեւա խաղի ընթացքում: Բավականին դժվար պայքար է սպասվում, քանզի, ինչպես միշտ, ուժեղ մրցակիցների պակաս չենք ունենալու: Ամեն ինչ անելու ենք հաջողության հասնելու համար:

-Արդեն հրապարակել եք թիմի կազմը՝ ըստ խաղատախտակների: Ի՞նչ սկզբունքով եք կատարել ընտրությունը:

-Գլխավորապես ՖԻԴԵ-ի համաշխարհային դասակարգման սանդղակում տղաների ունեցած անհատական գործակցի հիման վրա եմ որոշել մեր շախմատիստների տեղն ըստ խաղատախտակների: Բացի այդ, նկատի եմ ունեցել միջազգային վերջին մրցումներում նրանց գրանցած արդյունքները: Ինքնին հասկանալի է, թե ինչու է առաջին խաղատախտակին հանդես գալու Լեւոն Արոնյանը: Միջազգային ասպարեզում անցած ամիսներին բավականին լավ արդյունքներ է գրանցել նաեւ Գաբրիել Սարգսյանը, որը, կարծում եմ, արժանի է 2-րդ խաղատախտակին ներկայանալուն: Այնուհետեւ գալիս են Սերգեյ Մովսիսյանը եւ Վլադիմիր Հակոբյանը:

-Դա վերջնակա՞ն դասավորություն է, թե մրցակցի ուժից ելնելով՝ կարող է սրբագրվել:

-Ինքնըստինքյան այդպես է լինելու, քանզի մեր պահեստային խաղացողը Տիգրան Քոթանջյանն է, որը նույնպես ուժեղ շախմատիստ է: Իսկ տվյալ հանդիպման կազմը, ճիշտ նկատեցիք, որոշելու ենք մրցակցի ուժից ելնելով: Բացի այդ, ընտրելիս հաշվի ենք առնում տվյալ շախմատիստի սկզբնախաղային վարպետությունը: Դա արդեն մեր ներքին խոհանոցն է:

-Հետեւե՞լ եք, թե ինչ փոփոխություններ կան մեր հիմնական մրցակիցների կազմում:

-Անշուշտ, բոլորին էլ շատ լավ ենք ճանաչում: Ռուսաստանի հավաքականը հզոր կազմ ունի, սակայն նրանց դեմ վերջին երկու խաղերը վատ չենք անցկացրել: Եվրոպայի թիմային առաջնությունում հաղթել ենք, իսկ համաշխարհային ստուգատեսում՝ ոչ-ոքի խաղացել, բայց մոտ էինք հաղթելուն: Ուժեղ թիմերի միջեւ պայքարն, ինքնին հասկանալի է, անչափ լարված է լինում եւ, սովորաբար, վճռորոշ է դառնում շախմատիստներից մեկի սխալը: Նման հանդիպումներում խոշոր հաշիվ հազվադեպ է գրանցվում: Պատահում է, որ մրցամարտում հաղթում է այն թիմը, որի խաղացողները սկզբնախաղից հետո շահեկան դիրքեր չեն ունենում: Լինում է եւ հակառակը: Այնպես որ կանխատեսումներ անելը շատ դժվար է, որովհետեւ ամեն ինչ հնարավոր է:

-Ի՞նչ տրամադրությամբ եք մեկնում Նորվեգիա:

-Շատ լավ: Մեկնում ենք երկու օր շուտ, որպեսզի հասցնենք ընտելանալ տեղի՝ անհամեմատ զով եղանակին:

-Մեկնելուց առաջ ինչ-որ արարողակարգ ունե՞ք, որին անպայման հետեւում եք:

-Բոլոր շախմատիստներն էլ սնահավատ են: Հենց այդ հանգամանքից ելնելով էլ չեմ բացահայտի մեր արարողակարգը: Առայժմ թող գաղտնի մնա: Ասեմ միայն, որ դա մինչեւ այժմ գործել է…

Հեղինակ` Հրայր Նազարյան