Փաստ ինֆո

«Հին Էրիվանի» սեփականատեր Մանվել Տեր-Առաքելյանի անունից հայց է ներկայացվել դատարան ընդդեմ դատավոր Արմեն Բեկթաշյանի՝ պատվի ու արժանապատվության պաշտպանության պահանջով: Դատավորը`  քննելով ձեռնարկատեր  Մ.Տեր-Առաքելյանի հայցը՝ անհիմն դուրս է հրավիրել Մ.Տեր-Առաքելյանին դատարանի դահլիճից, ձայնագրառման մեջ լսվում է, թե ինչպես դատավորը ասում է՝ «խուժան»:

Ինչպես «Փաստինֆո»-ն տեղեկացավ ձեռնարկատեր Մանվել Տեր-Առաքելյանի մամուլի կենտրոնից, դատավորի այս գործողությունների  առնչությամբ Մ.Տեր-Առաքելյանը դիմել է ՀՀ արդարադատության խորհրդին, ՀՀ արդարադատության նախարարությանը, Դատարանների նախագահների խորհրդի էթիկայի հանձնաժողովին:

Ի դեպ,   այսօր սկսվել է Մանվել Տեր-Առաքելյանի բողոքի քննությունը Վերաքննիչ դատարանում: Ձեռնարկատերը բողոքարկել է, դատավոր Բեկթաշյանի նախագահությամբ կայացված որոշումը, որով մերժվել էր «Յունիբանկի» վարչության նախագահ Վ.Աթայանի նկատմամբ  սուտ մատնության հոդվածով քրեական գործ չհարուցելու որոշման համար վարույթն իրականացնող մարմնի դեմ Մանվել Տեր-Առաքելյանի բողոքը: Մեկուկես ժամ տևած դատական նիստի ընթացքում ձեռնարկատերը հաճելիորեն զարմացել է, որ Վերաքննիչ դատարանը թույլ է տվել անձամբ հայտնել իր դիրքորոշումը, ինչից զրկված է եղել Ա.Բեկթաշյանի նախագահությամբ գործի քննության ընթացքում: Վերաքննիչ բողոքի քննությունը կշարունակվի սեպտեմբերի 8-ին:  

Հիշեցնենք, որ բողոքի համար հիմք էին ծառայել հետևյալ հանգամանքները. 2009թ. մայիսի 25-ին «Յունիբանկի» և «Հին Էրիվանի» սեփականատիրոջ միջև կնքվել էր պայմանագիր՝ վճարումների հետաձգման մասին:

Մանվել Տեր-Առաքելյանը զարմանքով հայտնաբերել է, որ վարկի գումարների վճարումը հետաձգվել է ոչ թե մինչև 2019թ., ինչի մասին կողմերը բանավոր պայմանավորվել էին, այլ՝ մինչև 2017թ.:

Մ.Տեր-Առաքելյանն այս մասին հայտնել է Աթայանին, վերջինս հավաստիացրել է, որ թյուրիմացություն է տեղի ունեցել, կշտկվի: Եվ, իրոք, երկրորդ տարբերակում տեխնիկական սխալն ուղղված է եղել: 

Այդուհանդերձ, 2011թ. հուլիսի 13-ին Վարդան Աթայանը դիմել է ՀՀ ոստիկանության կազմակերպված հանցավորության դեմ պայքարի վարչություն՝ հայտարարելով, որ շտկված պայմանագրում ստորագրություններն ու կնիքը կեղծված են՝ իբրև Մ.Տեր-Առաքելյանի կողմից ֆինանսական շահույթ ստանալու նպատակով:

Փորձաքննության եզրակացությամբ, սակայն, հերքվել է այս պնդումը, այսինքն՝ որևէ կեղծիք չի հայտնաբերվել:

Մանվել Տեր-Առաքելյանը պահանջել էր քրեական գործ հարուցել Աթայանի նկատմամբ՝ զրպարտության համար, սակայն քննիչը գտել էր, որ Աթայանի դեմ քրեական գործ հարուցելու համար հիմքեր չկան:

Դատախազը  մերժել էր քննիչի որոշման դեմ ներկայացված բողոքը, իսկ դատական ատյանները՝ քննիչի ու դատախազի որոշումները վերացնելու պահանջի մասին Տեր-Առաքելյանի հայցը: