Փաստ ինֆո

ՀՀ փաստաբանների պալատի նախագահ Արա Զոհրաբյանի որոշմամբ՝ կարգապահական վարույթ է հարուցվել փաստաբան Ռուբեն Բալոյանի նկատմամբ:

Նման որոշման համար  հիմք է ծառայել ԶԼՄ հրապարակումն այն մասին, որ դատական նիստից հետո Ռուբեն Բալոյանը դատարանի բակում իր գործընկեր փաստաբան Նիկոլայ Բաղդասարյանի նկատմամբ անհարգալից վերաբերմունք է ցուցաբերել:

Կարգապահական վարույթը հարուցվել է հետևյալ պատճառաբանությամբ. «Փաստաբանության մասին» Հայաստանի Հանրապետության օրենքի 39-րդ հոդվածի 1-ին մասի համաձայն` փաստաբանը ենթակա է կարգապահական պատասխանատվության սույն օրենքի և փաստաբանի վարքագծի կանոնագրքի պահանջները խախտելու համար: Նույն հոդվածի 4-րդ մասի համաձայն՝ կարգապահական վարույթ հարուցելու հիմքն է փաստաբանի արարքի մեջ սույն օրենքի կամ փաստաբանի վարքագծի կանոնագրքով նախատեսված պահանջների խախտման հատկանիշների առերևույթ առկայությունը»:

Պալատի նախագահի որոշման մեջ նշված է նաև, որ «փաստաբանի նկատմամբ կարգապահական վարույթ հարուցելն ինքնին չի նշանակում, որ փաստաբանը թույլ է տվել կարգապահական խախտում, և այդ հարցի վերջնական պատասխանը կարող է տրվել միայն կարգապահական վարույթի իրականացման արդյունքում` Պալատի խորհրդի համապատասխան որոշմամբ»:

Իսկ խախտում եղել է, թե՝ ոչ, պարզ կդառնա միայն եթե հաստատվի «հրապարակման մեջ նշված «Արա, ես քո հետ տղայականով եմ խոսում, ոչ թե որպես փաստաբան» արտահայտությունը փաստաբան Ռուբեն Բալոյանի կողմից արտաբերելու և այն փաստաբան Նիկոյալ Բաղդասարյանին ուղղելու վերաբերյալ տեղեկությունը»,- նշված է որոշման մեջ:

Ի դեպ, Պալատի նախագահի որոշմամբ՝ կարգապահական վարույթի կողմ՝ դիմող է ճանաչվել փաստաբան Նիկոլայ Բաղդասարյանը:

Հիշեցնենք, ինչպես արդեն հաղորդել էինք, հուլիսի 18-ին կայացած Վարդան Պետրոսյանի գործով վերջին դատական նիստի ավարտից հետո՝ դատարանի բակում, բախումային իրավիճակ էր ստեղծվել կողմերի միջեւ։ Կողմերը, դուրս գալով դատարանի շենքից, հավաքվել էին բակում, որտեղ էլ դարձյալ վիճաբանություն էր սկսվել՝ չկայացած հաշտության հարցի կապակցությամբ։

Ընդ որում, վիճաբանությունն սկսել էր հենց տուժող կողմի ներկայացուցիչ Ռուբեն Բալոյանը, ով մոտենալով Ն.Բաղդասարյանին՝ վերջինիս մեղադրել էր իր գործողություններով հնարավոր հաշտությունը խոչընդոտելու մեջ։

Ապա Ն.Բաղդարյանին, Վ.Պետրոյանի մտերիմներին էին մոտեցել նաեւ տուժողները՝ նրանց դիմելով վիրավորական արտահայտություններով ու հայհոյանքներով։

Եվ միայն դատական կարգադրիչների միջամտության շնորհիվ էր հաջողվել խուսափել լուրջ բախումներից:

Նշենք, որ Վարդան Պետրոսյանի գործով հերթական նիստը Կոտայքի մարզի ընդհանուր իրավասության դատարանի Աբովյան քաղաքի նստավայրում կմեկնարկի այսօր՝ 14:00-ին: