Փաստ ինֆո

Երևանի Տերյան փողոցում ուսանող Տիգրան Հայրապետյանի սպանության գործով երկրորդ մեղադրյալը` Դավիթ Մանուկյանն այսօր դատարանում խնդրել է իրեն հնարավորություն տալ ծառայել հայոց բանակում: Ամբաստանյալը, ով մեղադրվում է մի խումբ անձանց կամ կազմակերպված խմբի կողմից խուլիգանության և հանցագործությունը պարտակելու մեջ, այսօր դատարանում հայտարարեց, որ  իրեն մեղավոր չի ճանաչում: Ավելին` նա կարծիք հայտնեց, որ պետք է կայացվի արդարացման դատավճիռ` միաժամանակ խնդրելով իրեն հնարավորություն տալ ծառայել զինված ուժերում և պաշտպանել Հայրենիքը:

Նա հայտարարեց, որ իր ընկերոջ՝ խուլիգանական դրդումներով սպանություն կատարելու մեջ մեղադրվող Հայկ Աղամալյանի հետ գնացել է պարզաբանումների և ոչ թե կռիվ անելու՝ վերջինիս ընկերոջը ծեծի ենթարկելու հետ կապված: Ըստ Դավիթ Մանուկյանի, ինքը լսել է «ո՞վ է խփել իմ ընկերոջը» Հայկ Աղամալյանի բացականչությունը, սակայն նրա  գործողությունները չի տեսել: Ըստ ամբաստանյալ Մանուկյանի, ինքը խուլիգանություն չի կատարել, ընդամենը ինքնապաշտպանվել է իրեն հարվածող երկու անձանցից, իսկ արյունոտ դանակը գետնից վերցրել է, որ որևէ մեկը չվերցնի ու չվնասի ուրիշի: Ըստ մեղադրանքի, Մանուկյանը մեղադրվում է հանցագործության գործիք դանակը պարտակելու մեջ:

Դավիթ Մանուկյանի ցուցմունքն ավելի շատ պաշտպանական ճառ էր հիշեցնում, քան ցուցմունք, ընդ որում,    պաշտպանությունը տարածվում էր նաև ամբաստանյալ Հայկ Աղամալյանի վրա: Մանուկյանը, մասնավորապես, հայտարարեց, որ «ակնհայտ է, որ Տիգրանին հարվածողն այլ անձ է եղել»՝ դանակի  վրա քիչ արյուն կար:  Նա պնդեց, որ Հայկ Աղամալյանի դեմ ցուցմունքներ տված Մարտին Գևորգյանը նախկինում Հայկի հետ թշնամանք է ունեցել, կռիվներ են եղել նրանց միջև:

Դատարանում հրապարակվեց Մանուկյանի նախաքննական ցուցմունքը. ի պատասխան քննիչի հարցին, թե  Տիգրան Հայրապետյանի դիակի վրա հայտնաբերվել է ոչ թե մեկ, այլ երեք սուր-կտրող-ծակող առարկայով հասցված վնասվածքներ, ի՞նչ կասեք այդ կապակցությամբ, Դ.Մանուկյանը  պատասխանել էր. «Երեք վնասվածքների մասին ես չեմ իմացել: Հայկը ինձ ասել է, որ մեկ անգամ է խփել մահացողին դանակով, որի մասին հայտնել է ոստիկանությունում և ընդունել, որ ինքն է սպանել Տիգրան Հայրապետյանին: Այդ ամենը Հայկը ինձ ասել է հեռախոսով զրույցի ժամանակ, երբ բերդից taxaphone-ից զանգել էր իմ համարին»:  Ամբաստանյալը հերքեց իր այս ցուցմունքը, որը տալու ժամանակ ինքն անչափահաս է եղել ու հարցաքննվել է հոր ներկայությամբ: Հարցաքննության ժամանակ իր նկատմամբ բռնություն եղե՞լ է դատարանի հարցին ամբաստանյալը բացասական պատասխան տվեց:

Դատարանում Դավիթ Մանուկյանը պնդեց, որ Հայկը Տիգրանին  չի ճանաչել, ուստի և որևէ պատճառ չուներ տուժողին վնասվածք պատճառել:

Այն հարցին, թե «պարզաբանումների» գնացող խմբին առաջնորդո՞ւմ էր Հայկը, Դավիթ Մանուկյանը հայտարարեց՝ նա առջևից էր գնում:

Ավելի վաղ ցուցմունքում անչափահաս ամբաստանյալ Հայկ Աղամալյանը հայտարարել էր, որ ինքը կյանքից չի զրկել Տ.Հայրապետյանին, իսկ այդ մասին հայտարարող վկաները պարզապես սուտ ցուցմունք են տվել: Ամբաստանյալը  նշել էր, որ  «հնարված պատմություններով իմ դեմ են տրամադրել տուժողի հարազատներին»:

Ամբաստանյալն ընդունել էր, որ «չգիտեմ ինչու գոռացել եմ՝ ո՞վ է խփել իմ ընկերոջը» ու դանակով հարվածել է  ոչ թե Տիգրան Հայրապետյանին, այլ սև կուրտկայով տղայի աջ ուսին, արյուն է տեսել, վախեցել է, փախել: Իսկ երբ իմացել է, որ Տիգրանը մահացել է, կարծել է,  որ ինքն է նրան սպանել, սակայն տեսնելով տուժողի դիակի լուսանկարները, համոզվել է, որ նա սև կուրտկայով տղան չէ: «Ոչ մոտեցել եմ, ոչ ճանաչել եմ Տիգրանին»,- ասել էր  նա: