Փաստ ինֆո

Սեռական շահագործման նպատակով կանանց թրաֆիքինգի հերթական գործով այսօր ավարտվեց դատաքննությունը և հաջորդ դատական նիստում ճառով հանդես կգա մեղադրող Արմեն Մարուխյանը:

Գործով մեղադրվում են Աղունիկ Այվազյանը և Ծովիկ Ավետիսյանը, ովքեր արդեն իսկ դատապարտյալներ են և թրաֆիքինգի վերաբերյալ գործով 2013թ. մայիսի  2-ի դատավճռով դատապարտվել են համապատասխանաբար՝   11 տարվա 7 ամսվա և տասուկես տարվա ազատազրկման:

Ներկա գործի շրջանակում  առաջադրված մեղադրանքի համաձայն, նրանք «մարդու թրաֆիքինգի` շահագործման նպատակով մարդկանց հավաքագրելու, տեղափոխելու, փոխանցելու, թաքցնելու, ստանալու, ինչպես նաև սեռական` պոռնկության շահագործման վիճակի մեջ դնելու և պահելու դիտավորությամբ, միավորվելով Արաբական Միացյալ Էմիրություններում բնակվող մի խումբ անձանց հետ, ստեղծել են կազմակերպված հանցավոր խումբ և իրենց հանցավոր մտադրությունն իրագործելու նպատակով կատարել են համապատասխան դերաբաշխում»:

Աղունիկ Այվազյանին և Ծովիկ Ավետիսյանին մեղադրանք է առաջադրվել  ՀՀ քրեական օրենսգրքի 132-րդ հոդվածի 3-րդ մասի 1-ին կետով՝  երկու կամ ավելի անձանց նկատմամբ շահագործման նպատակով հավաքագրելը, փոխադրելը, հանձնելը, թաքցնելը կամ ստանալը:

Գործով տուժողները երեքն են՝  Մարտակերտի, Ալավերդու ու Գյումրու բնակչուհիներ: Նրանցից մեկին՝ Գյումրու բնակչուհուն,  ներգրավել են՝ գայթակղելով  Իսպանիայում  «նկար հանողի» աշխատանքով: Չգիտես ինչու ոչ թե նկարահանվելու,  այլ «նկար հանողի» աշխատանք կատարելու համար անհրաժեշտ էին  գեղեցկադեմ աշխատողներ: Իսպանիան դարձել է Արաբական Միացյալ Էմիրություններ և «նկար հանելու փոխարեն» նրան պարտադրվել է զբաղվել մարմնավաճառությամբ:  

Ըստ տուժողի, ինքը եթե իմանար, որ մարմնավաճառությամբ պետք է զբաղվի, չէր համաձայնի,  նա, ի դեպ, չի համաձայնել, սակայն իրեն անելանելի վիճակի մեջ են դրել՝ վերցրել անձնագիրը, պարտադրել, որպեսզի աշխատի, վերադարձնի իր վրա ծախսված գումարը, ինքն էլ գտնվելով օտար երկրում, լեզվին չտիրապետելով, հարկադրված է եղել երկու տարի շարունակ զբաղվել մարմնավաճառությամբ:

Ինքը միակ մարմնավաճառուհին չէր՝ տուժողի տեղեկություններով, աղջիկ ներգրավելը նույնպես իր գինն ուներ՝ 1500 դոլար: Մարմնավաճառուհիներն ամեն օրվա համար  «գործատուներին» պարտավոր էին վճարել 600 դոլար, որոշ աղջիկների չէր  հաջողվում  գումարը վճարել և նրանց որպես պատիժ 3-4 օրով փակում էին սենյակում:

Դատարանում հրապարակվեցին մյուս երկու տուժողների նախաքննական ցուցմունքները, նրանց երկուսին էլ խոստացել են տուն մաքրողի կամ երեխա պահողի աշխատանք, սակայն Էմիրություններում պարտադրել են զբաղվել մարմնավաճառությամբ:

Դատապարտյալները հրաժարվեցին ցուցմունքներ տալուց ու հարցերին պատասխանելուց, սակայն Աղունիկ Այվազյանը հայտարարեց, որ «ես ինձ շատ մեղավոր եմ ճանաչում, որ  13 տարի ինքս ինձ չխղճալով՝  ենթարկվեցի շանտաժների», իսկ Ծովիկ Ավետիսյանը հայտնեց, որ մասնակի է իրեն մեղավոր ճանաչում՝ ինքնաթիռի տոմս  է  գնել, չի մտածել, որ  հանցագործություն է կատարում, այլապես չէր հայտնվի դատարանում, սակայն ավելի ուշ հայտարարեց, որ ընդունում է մեղադրանքը:   

Ի դեպ, կազմակերպված խումբը գլխավորելու մեջ մեղադրվող անձը ներկայումս գտնվում է հետախուզման մեջ,  ընդհանուր առմամբ դատապարտվել է 9 անձ, որից 5-ը որպես կազմակերպված խմբի անդամներ, իսկ մնացածը՝ որպես նրանց «ղեկավարության» ներքո գործող անձինք: