Փաստ ինֆո

Օֆշորային սկանդալ պայմանական անվանումն ստացած գործարար Աշոտ Սուքիասյանի նկատմամբ հարուցված քրեական գործում քրեական տարրեր չկան: «Փաստինֆո»-ի հետ զրույցում նման կարծիք հայտնեց գործով միակ մեղադրյալ Աշոտ Սուքիասյանի փաստաբան Յուրիկ Խաչատրյանը:

«Լիազորագրով գույք է գրավադրվել, պայմանավորվածություն է ձեռք բերվել գործարք կատարելու, բնականաբար, կան համապատասխան փաստաթղթերը` պայմանագրեր, լիազորագիր և մնացած գործառույթները, որոնք վկայում են այն մասին, որ իրականում պետք է խոշոր բիզնես կայանար, տեղի ունենար գործարք: Այսինքն քրեական տարր չեմ տեսնում որպես պաշտպանական կողմ»,- ասաց փաստաբանը` միաժամանակ կարծիք հայտնելով, որ իր վկայակոչած պայմանագրերը քաղաքացիաիրավական գործարքներ են:

Իսկ թե ինչու է այդ պարագայում, քրեական գործ հարուցվել, Յուրիկ Խաչատրյանն իր մեկնաբանությունն ունի: «Քրեական գործով է քննվում, որովհետև արդեն իսկ հարուցված է եղել որպես քրեական գործ` Աշոտ Սուքիասյանի բացակայության պայմաններում»,- ասաց փաստաբանը:

Հիշեցնենք, Ոստիկանության քննչական գլխավոր վարչության հատկապես կարևորագույն գործերով վարչության վարույթում քննվող քրեական գործը հարուցվել էր շուրջ 1 տարի առաջ` 2013 թվականի հունիսին: Գործի շրջանակներում նաև որոշում էր կայացվել կալանավորել Աշոտ Սուքիասյանին և նրա նկատմամբ հայտարարվել էր հետախուզում: Սուքիասյանին մեղադրանք էր առաջադրվել ՀՀ Քրեական օրենսգրքի 178-րդ հոդվածի 3րդ մասի 1-ին կետի, 184-րդ հոդվածի 2-րդ մասի 1-ին կետի և 190-րդ հոդվածի 3-րդ մասի 1-ին կետի հատկանիշներով, այն է` խոշոր չափի խարդախության, առանձնապես խոշոր չափերի գույքային վնաս պատճառելու, առանձնապես խոշոր չափերով հանցավոր ճանապարհով ստացված եկամուտներն օրինականացնելու հիմքով: 2014թ-ի սկզբին Աշոտ Սուքիասյանը հայտնաբերվեց Վրաստանի իրավապահների կողից և արտահանձնվեց ՀՀ-ին:

Ամեն ինչ սկսվեց «Հետք» պարբերականում հրապարակված լրագրողական հետաքննությունից, որի հեղինակները բացահայտում էին, որ գործարար Փայլակ Հայրապետյանի հետ կնքված գործարքի արդյունքում գրավադրված գույքի դիմաց ստացած շուրջ 10 միլիոն դոլարը Աշոտ Սուքիասյանը փոխանցել է օֆշորային գոտում  գրանցված կազմակերպությունների հաշիվներին: Լրագրողը բացահայտում էր նաև, որ հիշյալ կազմակերպության բաժնետերերից են նաև այդ ժամանակ դեռևս վարչապետի պաշտոնը զբաղեցնող Տիգրան Սարգսյանն ու Հայ առաքելական եկեղեցու Արարատյան հայրապետական թեմի առաջնորդ Նավասարդ արք. Կճոյանը: Ավելի ուշ Սուքիասյանը հայտարարել էր, թե այդ օֆշորային կազմակերպությունների հիմնադիրն ինքն է, իսկ վարչապետի ու Կճոյանի անունները գրանցել է առանց նրանց գիտության ու համաձայնության` իր բիզնեսն ապահովագրելու համար:

Անդրադառնալով այս հարցին` Աշոտ Սուքիասյանի փաստաբան Յուրիկ Խաչատրյանը նշեց. «առանց շոուների եթե նայենք սովորական, հասարակ գործ է, որը որևէ բարդություն չի ներկայացնում իրենից` պարզելու համար, թե ինչ է տեղի ունեցել, և ով ինչ վնաս է կրել»: Հարցին, թե ինչն է հատկապես «շոու» համարում, փաստաբանը պատասխանեց. «ԶԼՄ-ների բարձրացրած ամբողջ աղմուկը, որի նպատակը ոչ թե իրականությունը պարզելն էր, այլ, հեղինակավոր անձանց անուններ տալով, անընդհատ վարկաբեկել, անընդհատ կապել սույն գործի հետ»: Յուրիկ Խաչատրյանի կարծիքով, մերկապարանոց հայտարարություններ անելուց առաջ նախ հարկ է սպասել վարույթն իրականացնող մարմնի վերջնական գնահատականին: «Եթե մի անձ իրեն հարգում է և համոզիչ է ուզում լինել, պետք է նաև համապատասխան վարույթ իրականացնող մարմնի կողմից վերջնական կայացված որոշման հիման վրա խոսի: Եթե հիմա ես էլ ինչ ուզեմ ասեմ, լեզվին ոսկոր չկա, բայց հո ասելով չի, ամեն մեկն իր ասածի համար վերջում պատասխան պետք է տա: Պատասխան տալն էլ փաստերով է, եթե ասածը չի հիմնավորվում, տարբեր միջոցներ կան նաև Քաղաքացիական դատարան դիմելու` պատվի, արժանապատվություն վիրավորելու, այդ թվում նաև` Աշոտ Սուքիասյանի, եթե նման հիմքերը վերջնական պարզվեն»,-հայտարարեց փաստաբանը:

Իսկ ինչ վերաբերում է փաստերին, ապա Յուրիկ Խաչատրյանը հայտնեց, որ իր նշած բոլոր փաստերը նախաքննության ընթացքում սահմանված կարգով ներկայացրել է վարույթ իրականացնող մարմնին, և հույսով է, որ քննիչը նաև այդ փաստերի հիման վրա կկայացնի վերջնական որոշումը:

«Եթե այդ որոշումը մեզ չբավարարի, մենք կդիմենք արդեն Գլխավոր դատախազին»,-եզրափակելով մեզ հետ զրույցը` ասաց Աշոտ Սուքիասյանի փաստաբանը: