Փաստ ինֆո

Դատարանն այսօր  մերժեց  «Հին Էրիվան» ռեստորանային համալիրի սեփականատեր Մանվել  Տեր-Առաքելյանի հայցն ընդդեմ  «Յունիբանկի»` քրեական գործի հարուցումը մերժելու մասին հետաքննիչի որոշումը և այդ  որոշման օրինականությունը ստուգած՝ դատավարական ղեկավարում իրականացնող դատախազի որոշումը վերացնելու պահանջի մասին:

2013թ. սեպտեմբերին Մանվել Տեր-Առաքելյանը դիմել էր ոստիկանություն՝ պահանջելով «Յունիբանկի» վարչության նախագահ Վ. Աթայանի դեմ քրեական գործ հարուցել ՀՀ քրեական օրենսգրքի  214-րդ և 178-րդ  հոդվածների հատկանիշներով՝  առևտրային կամ այլ կազմակերպությունների  ծառայողների կողմից լիազորությունները չարաշահելը և խարդախություն:

Հետաքննիչ Ա.Հարթենյանը մերժել էր դիմումը, բողոքը մերժել էր նաև վերադաս դատախազ Դավթյանը:

Գործի նախապատմությունը հետևյալն է՝ «Յունիբանկը» հայտարարել էր,  որ  Մ.Տեր-Առաքելյանը խախտել է  վարկային պայմանագիրն ու մուծումների ժամկետները, և  Տեր-Առաքելյանի գույքի վրա կալանք էր դրվել, իսկ «Հին Էրիվան»-ը՝ ճանաչվել անվճարունակ՝ այն դեպքում, որ մուծումներ կատարվել են:

Այսօրվա դատական նիստը տևեց երկու ժամ, Մանվել Տեր-Առաքելյանը տասնյակից ավելի հարցեր ուղղեց վերահիշյալ հետաքննիչին: Մասնավորապես, «Հին Էրիվանի» սեփականատիրոջը հետաքրքրում էր, թե ինչո՞ւ է այդքան անփույթ հետաքննություն անցկացրել հետաքննիչը, ինչո՞ւ, մասնավորապես, հետաքննության շրջանակում քննիչի կողմից չեն ստուգվել անգամ բանկի հետ վարկային պայմանագրի պայմանները: Հետաքննիչը մեղմ ասած շռայլ չէր պատասխանների մեջ, միշտ նույն պատասխանն էր տալիս՝ նախկինում ես այդ մասին բացատրություն գրել եմ, «հարկ չեմ համարել», և դատավարական հսկողություն իրականացնող դատախազն էլ համաձայն էր ինձ հետ:

Մանվել Տեր-Առաքելյանն այսօր անդրադարձավ «Յունիբանկի» կողմից իրեն վարկի  գումարից 2,5 մլն. դոլար նվիրելու առաջարկին: Ձեռնարկատերը նկատեց, որ  եթե ինքը խարդախ մեկը լիներ, ինչպես փորձում է ներկայացնել «Յունիբանկը», արդյոք գումար նվիրելու առաջարկ կլինե՞ր: Ամեն ինչից առավել, ըստ Մանվել Տեր-Առաքելյանի, իր համար կարևոր է բարեխիղճ վճարողի իր բարի համբավի վերականգնումը: Իզուր չէ, որ դեռևս 2005թ. արաբական շեյխերը Արաբական Միացյալ Էմիրություններում ծանոթանալով իր անցած ուղուն ու կենսագրությանը,  իր հետ արքայի պես էին վերաբերվում:

Ձեռնարկատեր Մանվել Տեր-Առաքելյանի մամուլի կենտրոնից «Փաստինֆո»-ի թղթակցին հայտնեցին, որ անպայման բողոքարկելու են Մ.Տեր-Առաքելյանի դիմումը մերժելու մասին դատարանի որոշումը Վերաքննիչ դատարան, ապա նաև ընդհուպ մինչև Մարդու իրավունքների եվրոպական դատարան: