Փաստ ինֆո

Ֆուտբոլի աշխարհի 20-րդ առաջնության նախավերջին խաղում Հոլանդիայի հավաքականն արժանացավ բրոնզե մեդալի` 3:0 հաշվով հաղթելով բրազիլացիներին:

Հիրավի չար բախտ է հետապնդում Բրազիլիայի հավաքականին սեփական հողում. երկու անգամ ընդունելով համաշխարհային ստուգատեսը, երկու անգամ էլ հիասթափություն են պատճառում իրենց երկրպագուներին: Բայց, եթե 1950 թվականին նրանք գրավել են գոնե 2-րդ տեղը, ապա այժմ միայն 4-րդն են: Ինչ վերաբերում է մայրաքաղաք Բրազիլիայում տեղի ունեցած հաշվետու հանդիպմանը, ապա ճակատագրի հեգնանքով տանտերերի համար այն սկսվեց նույնքան անհաջող, որքան Գերմանիայի հավաքականի հետ կիսաեզրափակիչը: Արդեն 3-րդ րոպեին Տյագո Սիլվան ստիպված էր կանոնների խախտումով կասեցնել բրազիլացիների տուգանային հրապարակ ներխուժած Արիեն Ռոբենի առաջխաղացումը: Դրա համար ալժիրցի մրցավար Ջամել Հայմուդին, բնականաբար, չշոյեց Սիլվայի գլուխը, այլ դեղին քարտ ցույց տվեց նրան և նշանակեց 11-մետրանոց հարված: Ի դեպ, սա բրազիլացիների ավագի արդեն 3-րդ դեղին քարտն էր այս առաջնությունում (նախորդ երկուսի պատճառով նա բաց թողեց կիսաեզրափակիչ խաղը): Իսկ 11-մետրանոցն անվրեպ իրացրեց Ռոբին վան Պերսին:

Չհասցրեցին տանտերերն ուշքի գալ, երբ 17-րդ րոպեին գնդակը երկրորդ անգամ հայտնվեց նրանց դարպասում: Այս անգամ՝ ջերմ ողջույն Դեյլի Բլինդից Դավիդ Լուիսին: Բրազիլիայի առջև վերստին ուրվագծվեց ջախջախման ուրվականը: Սակայն, հոլանդական «մեքենայի» շարժչի հզորությունը չձգեց գերմանականի մակարդակին: Բրազիլիայի հավաքականը, ոչ առանց մրցակցի թողտվության, հետզհետե հավասարեցրեց խաղը և անցավ արագ կոմբինացիոն գործողությունների: Նրանց կատարմամբ այդպիսի խաղ տեսանք առաջին խաղակեսի վերջում և երկրորդի առաջին 30 րոպեներին: Սակայն, առջևի գծում բրազիլացիներին պակասում էր ստեղծագործական ջիղը: Որքան է՞ր զգացվում Նեյմարի բացակայությունը: Իսկ վերջինս միայն բարոյապես էր աջակցում թիմակիցներին՝ պահեստայինների նստարանից:

Աստիճանաբար բրազիլացիների ուժն ու եռանդը մարեց և հոլանդացիները վերստին աշխուժացան: Այնքան, որ հանդիպման արդեն փոխհատուցված ժամանակի 2-րդ րոպեին նրանք արագ հակագրոհ անցկացրին, որի արդյունքում Ջորջինիո Վեյնալդումը (նկատեցի՞ք բրազիլականի ձգող անուն-ազգանուն է) սահմանեց վերջնարդյունքը:

Այդպիսով, Հոլանդիան նախորդ առաջնության արծաթե մեդալները փոխարինեց բրոնզով, իսկ Բրազիլիան՝ 7-րդ տեղը 4-րդով: Ու երկուսն էլ մնացին հիասթափված:

Ի դեպ, հոլանդացիները գոնե թեթևակի սփոփվեցին, ու, տեսնելով, թե որքան անկեղծ ուրախությամբ էին նշում խփած գոլերը, հասկանում ես, որ անտեղի և անիմաստ են 3-րդ տեղի համար հանդիպումները վերացնելու մասին խոսակցությունները:
 
 

Հեղինակ` Հրայր Նազարյան