Փաստ ինֆո

Ամերիկացի Ջերեմի  Հիթոնը (Jeremiah Heaton) իրեն հռչակել է «Հյուսիսային Սուդանի» թագավոր եւ հավակնում է Սուդանի եւ Եգիպտոսի միջեւ ընկած հողատարածքին: Այս մասին գրում է The Washington Post-ը: Նման որոշում նա կայացրել է իր փոքրիկ աղջկա ամենաբաղձալի երազանքը կատարելու համար, այն է` դառնալ արքայադուստր:

Երեք երեխաների հայր Հիթոնը, ով  աշխատում է լեռնահանքային արդյունաբերության ընկերությունում, ծնունդով Վիրջինիայից, որոշել է կատարել աղջկա ցանկությունը եւ սկսել է համացանցում փնտրել հարմար տարածք` նոր թագավորության համար:

Այդ տեղը դարձել է Աֆրիկայում անապատի մի կտոր` մոտավորապես 200 կմ տարածքով: Մի քանի ամիս անց ամերիկացին գնացել է այնտեղ եւ հունիսի 16-ին` իր աղջա 7-ամյակին,  մի քարքարոտ սարալանջին բարձրացրել կապույտ դրոշ, որի վրա պատկերված է 4 հատ աստղ եւ թագ:

«Ես ցանկանում էի ցույց տալ իմ երեխաներին, որ տառացիորեն աշխարհի ծայրը կգնամ` նրանց ցանկությունները կատարելու համար», - ասել է երջանիկ հայրը:

Տեղացիներն այդ հողերն անվանում են Բիր-Թավիլ: Այն ունիկալ մի տարածք է, որին չի հավակնում աշխարհի որեւէ պետություն: Ռիչմոնդի համալսարանի միջազգային հետազոտությունների եւ քաղաքագիտության պրոֆեսոր Շեյլա Կարապիկոն (Sheila Carapico) հստակեցրել է, որ այդ տարածքի նկատմամբ քաղաքական իշխանություն ստանալու համար Հիթոնին անհրաժեշտ է, որ «Հյուսիսային Սուդանը» ճանաչվի հարեւան պետությունների եւ ՄԱԿ-ի կողմից:

Ինքնահռչակ թագավորը ծրագրում է աջակցության համար դիմել Աֆրիկյան միությանը: Ապա` Հիթոնը ծրագրում է բարեկամական հարաբերություններ հաստատել Սուդանի եւ Եգիպտոսի առաջնորդների հետ` իր  թագավորությունը վերածելով գյուղատնտեսության կենտրոնի, ինչպես ցանկանում են նրա երեխաները եւ հատկապես փոքրիկ Էմիլիան: