Փաստ ինֆո

Իրանի բանակցությունները Ռուսաստանի հետ բարտերային նավթային համաձայնության շուրջ կախված չեն Վիեննայում «վեցնյակի» հետ երկխոսության արդյունքներից: Այս մասին «ИТАР-ТАСС»-ի փոխանցմամբ, հաղորդում է ИРНА գործակալությունը:

Իրանի նավթի փոխնախարար Ալի Մաջեդին, ով արտասահմանյան գործարար կապերի գծով պատասխանատու պաշտոնատար անձ է, հայտարարել է, որ Թեհրանի ու Մոսկվայի միջև այժմ ընթացող բանակցությունները «բարտերային նավթային համաձայնության» նախագծի մշակման շուրջ կախված չեն «վեցնյակի» երկրների (ՄԱԿ-ի ԱԽ անդամ 5 երկրներ գումարած Գերմանիա) հետ իրանյան միջուկային ծրագրի շուրջ Վիեննայի  բանակցությունների «առաջընթացից  կամ ձախողումից»:

Ռուսաստանի ու Իրանի միջև գործարքների ծավալը էլեկտրաէներգետիկայի ոլորտում կարող է  հասնել  $10 մլրդի: Ալի Մաջեդին հերքել է մամուլում հայտնված տեղեկություններն առ այն, որ Ռուսաստանի հետ բանակցությունները դադարեցվել են, իբր, Վիեննայում «որոշակի առաջընթացի հասնելու» հետ կապված: Միաժամանակ, ինչպես նշում է «ИРНА»-ն,  նա ընդգծել է, որ երկու երկրների պատվիրակությունները շարունակում են համատեղ աշխատել բարտերային նավթային համաձայնության պայմանագրի նախագծի վրա՝ «ցանկալի արդյունքի հասնելու համար»: Իրանի նավթի փոխնախարարը նաև մատնանշել է, որ «կողմերը լրջությամբ են մոտենում համաձայնության դրույթների մշակմանը», սակայն հրաժարվել է հայտնել որևէ մանրամասն՝ պատճառաբանելով  «մանրամասների շարունակվող համաձայնեցմամբ»:

Ալի Մաջեդին հատկապես ընդգծել է, որ քանի որ Իրանը Ռուսաստան նավթի մատակարարման համար չի կարող օգտագործել իր նավահանգիստները Կասպից ծովում, ապա նա ծրագրում է այդ նպատակով օգտագործել երկրի հարավում գտնվող տերմինալները:

«ИРНА»-ն միաժամանակ՝  վկայակոչելով ոչ պաշտոնական աղբյուրները, նշում է, որ Իրանի և Ռուսաստանի բանակցությունները նպատակ ունեն կնքել բարտերային գործարք  20 մլրդ դոլարի չափով՝ վերջինիս պայմանների համաձայն, Իրանի կողմից Ռուսաստան մատակարարվելիք նավթի դիմաց Իրանը կստանա ապրանքներ և երկրին անհրաժեշտ սարքավորումներ:

Ավելի վաղ ՌԴ էներգետիկայի նախարար Ալեքսանդր Նովակը, ով ռուս-իրանական առևտրատնտեսական համագործակցության մշտական հանձնաժողովի համանախագահն է, հայտարարել էր, որ Իրանի հետ առևտրաարդյունաբերական համագործակցության համաձայնագիրը կստորագրվի սեպտեմբերին: