Փաստ ինֆո

Սեռական շահագործման գործով անցնող երկու ամբաստանյալները Երևանի Կենտրոն և Նորք Մարաշ վարչական շրջանների ընդհանուր իրավասության դատարանի հուլիսի 11-ի դատական նիստում հրաժարվեցին դիրքորոշում հայտնել իրենց առաջադրված մեղադրանքի վերաբերյալ:

Նիստում մեղադրող դատախազ Արմեն Մարուխյանը հրապարակեց մեղադրական եզրակացությունը, ըստ որի՝ Աղունիկ Այվազյանը` շահագործման նպատակով մադկանց հավաքագրելու, տեղափոխելու, փոխանցելու, թաքցնելու, ստանալու, ինչպես նաև սեռական` պոռնկության շահագործման վիճակի մեջ դնելու և պահելու դիտավորությամբ, միավորվելով Արաբական Միացյալ Էմիրություններում բնակվող մի խումբ անձանց հետ, ստեղծել են կազմակերպված հանցավոր խումբ ` կատարելով համապատասխան դերաբաշխում:

Այսպես, Արաբական միացյալ Էմիրույթուններում բնակվող Նելլի Ներսիսյանը, ղեկավարել է հանցավոր խմբի գործողությունները` հավաքագրված անձանց Դուբայ տեղափոխելու, մուտքի հրավերի հետ կապված հարցերը,  Սերին Սարգսյանի և ոմն Նախառյի հետ կազմակերպել  հավաքագրած անձանց սեռական շահագործումը:

Բացի այդ, Նելլի Ներսիսյանի  ղեկավարած կազմակերպված հանցավոր խմբի անդամներից Աղունիկ Այվազյանը թրաֆիքինգի շահագորման նպատակով մարդուն հավաքագրելու դիատվորությամբ, խաբեությամբ  և վստահությունը չարաշահելով, ԱՄԷ Դուբայ քաղաքում ամսական 500 ԱՄՆ դոլար վարձատրվող աղախինի աշխատանքով ապահովելու կեղծ խոստումով, 2009թ. ամռան ամիսներին Հայաստանում Ալավերդի քաղաքում շահագործման նպատակով հավաքագրել է Նարինեին (անունը փոխված է), վերջինս համաձայնությունը ստանալուց հետո Աղունիկ Այվազյանը Նելլի Ներսիսյանի միջոցով ստացել է   ԱՄԷ Դուբայ քաղաքի հրավերը, եւ նույն թվականին  նրան ուղարկել Դուբայ: Քրեական գործի տվյալներով, ճանապարհածախսը հոգացել է Ներսիսյանը, իսկ Դուբայում Նարինեն  աղախին աշխատելու փոխարեն ենթարկվել է սեռական շահագործման:

Ծովիկ Ավետիսյանը մեղադրվում է սեռական շահագործման ենթարկելու նպատակով ձեւավորված հանցավոր խմբի կազմում գործունեություն ծավալելու մեջ` հաձայն կատարված համապատասխան դերաբաշխման:

Ըստ նախաքննական մարմնի,  Ծ.Ավետիսյանը հանցավոր խմբի միջոցով և անձամբ շահագործման նպատակով մարդկանաց հավաքագրելու և տեղափոխելու վերաբերյալ նախնական  համաձայնության է եկել ՀՀ-ոմ բնակվող մի քանի անձանց հետ:

Այսպեսով, 2009թ. Վրաստանի հանրապետության Ախալքալաքի շրջանում, այնուհետև Երևան քաղաքում խաբեությամբ և վստահությունը ճարաշահելու միջոցով, Իսպանիայում` ֆոտոսրահում, բարձր վարձատրվող աշխատավարձով ապահովելու կեղծ խոստումներով, սակայն իրականում ԱՄԷ Դուբայ քաղաքում սեռական շահագործման ենթարկելու նպատակով հավաքագրել է ՀՀ քաղաքացի Կարինեին (անունը փոխված է) և մի քանի այլ կանանց: Բոլոր այս դեպքերով կանայք ենթարկվել են սեռական շահագործման, իսկ նրանց վաստակած գումարները ստացել է հանցավոր խմբի ղեկավար Նելլի Ներսիսյանը:

Աղունիկ Այվազյանին և Ծովիկ Ավետիսյանին մեղադրանք է առաջադրվել ՀՀ քրեական օրենսգրքի 132-րդ հոդվածի 3-րդ մասի 1-ին կետով: Նրանց նկատմամբ խափանման միջոց չի ընտրվել, քանի որ արդեն իսկ գտնվում են կալանքի տակ` մեկ այլ քրեական գործի շրջանակներում դատապարտվելով ազատազրկման:  Աղունիկ Այվազյանը նախկինում 5 անգամ է  դատապարտվել, իսկ Ծովիկ Ավետիսյանը՝ 1 անգամ:

Դատարանի սահմանած ապացույցների հետազոտման հաջորդականության համաձայն` նախ կհարցաքննվեն տուժողները, ապա կհետազոտվեն գործում առկա գրավոր ապացույցները, իսկ վերջում՝ ցուցմունք կտան ամբաստանվող կանայք:

Հուլիսի 11-ի դատական նիստին տուժողները դատարան չէին ներկայացել եւ նիստը հետաձգեց հաջորդ դատական նիստին`  նրանց  ներկայությունն ապահովելու համար: