Փաստ ինֆո

Սյունիքի մարզի ընդհանուր իրավասության դատարանում քննվող` ժամկետային զինծառայող Սարգիսին ինքնասպանության հասցնելու վերաբերյալ քրեական գործով տուժող կողմը չի վստահում ոչ միայն դատավորին, այլև մեղադրող դատախազին:

Ըստ մեղադրական եզրակացության, 2012 թվականի նոյեմբերի 5-ին զինվորը մարտական հերթապահության ժամանակ իրեն ամրակցված ինքնաձիգով ինքնասպանություն է գործել: Իսկ պատճառը ոչ  կանոնագրքային փոխհարաբերություններն են եղել: Նախաքննական մարմինը պարզել է, որ ծառայակիցները տարբեր օրերի պարբերաբար հալածել են Սարգիսին, հարվածել, տվել սեռական բնույթի հայհոյանքներ : Իսկ դեպքի օրը մարտական հերթապահության մեջ ընդգրկված ծառայողները մեկ այլ հենակետից անօրինական կերպով բերված սննդամթերքը մենակ ուտելու համար Սարգիս Ս-ին սեռական բնույթի հայհոյանքներ են տվել, ստորացրել պատիվն ու արժանապատվությունը, իսկ վաշտի հրամանատարը ոչ միայն կատարվածի մասին չի զեկուցել վերադասին, այլև միջոցներ չի ձեռնարկել անօրինական գործողությունները կանխելու ուղղությամբ:

Արդյունքում կոչումով կրտսեր սերժանտներ  Արթուր Մ-ին և Արտաշես Խ-ին մեղադրանք է առաջադրվել զինվորին հալածելու համար, որի հետևանքով վերջինս իրեն ամրակցված զենքով ինքնասպանություն է կատարել:  Իսկ  նույն զորամասի  ավագ լեյտենանտ Գոռ Մ-ին` այն բանի համար, որ, չի կանխել նրանց  անօրինական գործողությունները:

Իսկ երկու զինծառայողների` Գառնիկ Գ-ին և Սամվել Մ-ին մեղադրանք է առաջադրվել այն բանի համար, որ մարտական հերթապահության ընթացքում առանց համապատասխան թույլատվության լքել են մարտական հենակետն ու գնացել այլ հենակետ` սննդամթերք բերելու:

Սյունիքի մարզի ընդհանուր իրավասության դատարանում արդեն շուրջ 1 տարի ընթանում է այս գործով դատավարությունը:

Հունիսի 16-ին տուժող կողմը` տուժողի իրավահաջորդ Սուզաննա Խչեյանը և փաստաբան Անի Թորոսյանը դատավոր Նապոլեոն Օհանյանին ինքնաբացարկ հայտնելու միջնորդություն ներկայացրեցին` պատճառաբանելով, որ դատարանը կանխակալ վերաբերմունք է դրսևորում և առավել կարևորություն է տալիս նախաքննության ժամանակ ձեռք բերած ապացույցներին: «Երբ նախորդ դատական նիստին ներկայացվեց միջնորդություն լրացուցիչ հետմահու դատահոգեբանական փորձաքննություն նշանակելու մասին, դատարանը մերժեց միջնորդությունն այն հիմնավորմամբ, որ եթե դատարանը խորհրդակցական սենյակում գտնի, որ անհրաժեշտ է վերսկսել գործի քննությունը, ապա համապատասխան որոշում կկայացնի»,- ասաց փաստաբանը: Իսկ մեղադրողներ Սերգեյ Խաչատրյանն ու Գագիկ Մայիլյանն առարկեցին ներկայացրած միջնորդությունների դեմ` նշելով, որ դատարանի կողմից կանխակալ վերաբերմունքի ցուցաբերում չի եղել, առավել ևս, տուժող և պաշտպանական կողմերի ներկայացված միջնորդությունները հիմնականում բավարարվել են:
Իսկ Սուզաննա Խչեյանի և փաստաբան Անի Թորոսյանի միջնորդությունները՝ դատավոր Նապոլեոն Օհանյանին ինքնաբացարկ հայտնելու մասին, դատարանը մերժեց:
Մի քանի օր անց` հունիսի 25-ին տուժող կողմը դարձյալ միջնորդություն ներկայացրեց` այս անգամ` դատախազին ինքնաբացարկ հայտնելու մասին: Հիմնավորելով միջնորդությունը` փաստաբանը նշեց, որ նախաքննական մարմնի կողմից կատարվել են «բազմաթիվ հանցավոր արարքներ` դեպքի վայրի ոչնչացում, իրեղեն կարևոր ապացույց հանդիսացող պարկուճի պարտակում, սպանության գործիք հանդիսացող ինքնաձիգի պարտակում, այն կեղծ սպանության գործիքով փոխարինում, իրեղեն ապացույցի վերաբերյալ ակնհայտ կեղծ եզրակացության տրամադրումը փորձագետ-նախաքննական մարմին զույգի կողմից, հանցավոր ճանապարհով գործով անցնող վկաներից կեղծ ցուցմունքերի կորզում ակնհայտ սպանությունը որպես ինքնասպանություն ներկայացնելու նպատակով, որը ուղեկցվել Է վկաներին ապօրինաբար ազատությունից զրկելով, վկաներին ծեծով, սպառնալիքներով, և այլ ապօրինի գործողություններով»։
«Այս բոլոր հանցավոր արարքները կատարվել են գործը հսկող դատախազ Մայիլյանի անմիջական հսկողության ներքո և մեր համոզմամբ նրա ցուցումներով»,- ասաց պաշտպանը:

Անի Թորոսյանը նաև հիշատակեց, որ 2013թ-ի դեկտեմբերի 13-ի դատական նիստի ժամանակ դատարանը ընդմիջում հայտարարեց հենց այն պահին, երբ վկան դեռ չէր ավարտել իր ցուցմունքը, իսկ դատախազ Գ.Մայիլյանը փորձեց ճնշում գործադրել վկայի հանդեպ` արդարանալով, թե իբր ինքը ցանկանում Է Գ.Մարգարյանից հաղորդում վերցնել հանցագործության մասին։

«Որպես պաշտոնական դիրքի չարաշահման և պաշտոնական լիազորությունների սահմանանցման փաստ պետք է որակել նաև այն, որ նախաքննության ավարտից հետո 2013 թվականի սեպտեմբեր-նոյեմբեր ամիսներին Գ.Մայիլյանը, համաձայն վկա Գ.Մարգարյանի ցուցմունքի, 3-4 անգամ զանգել է իր բջջային համարին և ցուցումներ տվել, թե ինչ պետք է ասի դատարանում։ Ըստ էության, վկա Գ.Մարգարյանի ցուցմունքից ակնհայտ է դառնում նաև, որ Գ.Մայիլյանը քաջատեղյակ էր այն մասին, որ վկայից ցուցմուքները կորզվել են անօրինական ճանապարհով և չեն համապատասխանում իրականությանը։ Ի դեպ դատախազ Մայիյյանը դատարանում չհերքեց, որ ինքը մի քանի անգամ զանգահարել է վկա Գ.Մարգարյանին 2013թ. սեպտեմբեր-նոյեմբեր ամիսներին։Իրենց կողմից ներկայացված փաստերի հիման վրա համոզմունք ենք հայտնում մեղադրող դատախազ Գ.Մայիլյանի գործով շահագրգռված լինելու վերաբերյալ»,- հայտարարեց Անի Թորոսյանը:

Այդուհանդերձ, Տուժողի իրավահաջորդ Սեյրան Սահակյանի և տուժողի իրավահաջորդի ներկայացուցիչներ Սուզաննա Խչեյանի և Ռուբեն Մարտիրոսյանի այս միջնորդությունը` քրեական գործով մեղադրող Գագիկ Մայիլյանին բացարկ հայտնելու մասին, դատարանը ևս մերժեց:

Քրեական գործի դատաքննությունը շարունակվում է: