Փաստ ինֆո

ՀՀ դատական դեպարտամենտի նախկին ղեկավար Միսակ Մարտիրոսյանը  ու նրա պաշտպան Վարդան Զուռնաչյանը այս փուլում մտադիր չեն միջնորդություններ ներկայացրել վարույթ իրականացնող մարմնին: Այս մասին  «Փաստինֆո»-ի թղթակցին հայտնեց Մ.Մարտիրոսյանի պաշտպան Վ.Զուռնաչյանը՝ պարզաբանելով, որ չեն վստահում նախաքննության մարմնին, միջնորդությունները կներկայացնեն դատարանում:

Վ.Զուռնաչյանը հայտնեց, որ քննիչն իրեն ու իր պաշտպանյալին ներկայացրել է նախաքննության ավարտի մասին որոշումը, որի հետ իրենք ծանոթացել են, ստացել են նաեւ քրեական գործի նյութերի պատճենները:

Միսակ Մարտիրոսյանը մեղադրվում է դատական կարգադրիչների համակարգում աշխատավարձերի յուրացման փաստերով հարուցված քրեական գործի շրջանակում՝ՀՀ քրեական օրենսգրքի 179-րդ հոդվածի 3-րդ մասի 1-ին և 2-րդ կետերով՝ կազմակերպված խմբի կողմից առանձնապես խոշոր չափերով յուրացնելը կամ վատնելը: Միսակ Մարտիրոսյանը մեղադրվում է նաև ՀՀ քրեական օրենսգրքի  311-րդ հոդվածի 3-րդ մասի 2-րդ և 3-րդ կետերով՝ մի խումբ անձանց կողմից նախնական համաձայնությամբ խոշոր չափերով կաշառք ստանալը՝ երկու դրվագով, և 311-րդ հոդվածի 1-ին մասով՝ կաշառք ստանալը:
 
ՀՀ քրեական օրենգրքի 311-րդ հոդվածի 3-րդ մասի 2-րդ և 3-րդ կետերով` նույնպես երկու դրվագով, մեղադրանք է առաջադրվել նաև Անգին Ղուկասյանին:

Դատական կարգադրիչների ծառայության պետ Արմեն Մովսիսյանին մեղադրանք է առաջադրվել` ՀՀ քրեական օրենսգրքի 179-րդ հոդվածի 3-րդ մասի 1-ին և 2-րդ կետերով և 314-րդ հոդվածով՝ պաշտոնեական կեղծիք, նրա տեղակալ Գեղամ Գրիգորյանին, բացի վերջին երկու հոդվածից, մեղադրանք է առաջադրվել նաև 38-314-րդ հոդվածով՝ պաշտոնեական կեղծիքի օժանակություն, 34-38-312-րդ հոդվածի 3-րդ մասի 1-ին կետով՝ առանձնապես խոշոր չափերի կաշառք տալուն օժանդակելու փորձ, և 178-րդ հոդվածի 2-րդ մասի 2-րդ կետով՝ խոշոր չափերով խարդախություն:

Իսկ Դատական կարգադրիչների ծառայության պետի մեկ այլ տեղակալ Գագիկ Խաչատրյանին մեղադրանք է առաջադրվել` ՀՀ քրեական օրենսգրքի 179-րդ հոդվածի 3-րդ մասի 1-ին և 2-րդ կետերով:

ՀՀ քրեական օրենսգրքի 179-րդ հոդվածի 3-րդ մասի 1-ին և 2-րդ կետերով և 314-րդ հոդվածով մեղադրանքներ են առաջադրվել նաև Արմեն Ավագյանին, Բագրատ Արիկյանցին, Արեգ Գասպարյանին, Արման Փալիկյանին, Մերուժան Կյուրեղյանին, իսկ ՀՀ քրեական օրենսգրքի 179-րդ հոդվածի 3-րդ մասի 1-ին և 2-րդ կետերով՝ Յուրա Մուշկիդյանովին, Եղիազար Սարգսյանին և Սաթենիկ Հովհաննիսյանին:

Գործից անջատվել է  պաշտոնեական կեղծիք կատարելու վերաբերյալ այլ անձանց մասը, որով նախաքննությունը շարունակվում է:

Նշենք, որ «Փաստինֆո»-ի ունեցած հավաստի տեղեկություններով` դատական կարգադրիչների գործով որպես մեղադրյալ ներգրավվել են  ընդհանուր առմամբ 24 անձ, որոնցից 7-ը  կալանքի տակ է, մյուսների նկատմամբ խափանման միջոց է ընտրվել չհեռանալու մասին ստորագրությունը կամ կիրառվել է գրավ՝ որպես այլընտրանքային խափանման միջոց: