Փաստ ինֆո

«Բանդայի» գործով ամբաստանյալները շարունակում են պնդել նախաքննության ընթացքում իրենց  նկատմամբ կիրառված խոշտանգումների մասին:

Երևանի կենտրոն և Նորք-Մարաշ վարչական շրջանների ընդհանուր իրավասության դատարանում «Բանդայի» գործով  այսօրվա դատական նիստում մեղադրող դատախազ Սասուն Խաչատրյանի միջնորդությամբ հրապարկվեցին ամբաստանյալ Սամվել Դավթյանի նախաքննական ցուցմունքները:

Պարզվեց, որ ամբաստանյալ Սամվել Դավթյանը որպես կասկածյալ նախ հրաժարվել է ցուցմունք տալուց, ապա նշել է, թե ում տանից և ինչ ավազակային հարձակում են կատարել: Ամբաստանյալը ծանոթացել է հանգուցյալ Գուրգեն Հայրապետյանի հետ, ով, ըստ մեղադրանքի,  Բանդայի «պարագլուխ» Արտուշ Հակոբյանի հետ միասին ղեկավարել են պաշտոնատար անձանց տներից բանդայի կողմից կատարվելիք ավազակային հարձակման նախապատրաստությունը:

Իսկ որպես մեղադրյալ հարցաքննվելու ժամանակ ամբաստանյալն իրեն առաջադրված մեղադրանքի շուրջ հրաժարվել է դիրքորոշում հայտնել և ցուցմունք տալ:
Դատարանում ամբաստանյալը հերքեց իր նախաքննական ցուցմունքը՝ հայտարարելով, որ ինքը ոչինչ չի գրել, իսկ ցուցմունքում նշված ոմն Վարդանի անունը, որը, իբր, ավազակային հարձակման ժամանակ իր հետ է եղել՝ քանակ լրացնելու համար, մտացածին է: «Էտ պահին երևի Քենեդու սպանության համար, որ ասեին ստորագրի՝ կստորագրեի»,- ասաց ամբաստանյալը:

Ըստ նախաքննական ցուցմունքի՝ ամբաստանյալի մոտից խուզարկությամբ հայտնաբերվել է ափիոն տեսակի թմրանյութ,  ինչն էլ, ամբաստանյալի ներկայացմամբ,  գտել է Ամիրյան փողոցում:

Հաջորդիվ հարցաքննվեց ամբաստանյալ Դավիթ Գալստյանը, ով հայտարարեց, թե իրեն ձերբակալելուց հետո զգացել է, թե ինչպես են իր գրպանը թմրամիջոց գցում։  Ամբաստանյալի վարկածով՝ նախ գցել են, իսկ հետո էլ հանել։ «Կանաչ գույնի պլան էր»,- ասաց ամբաստանյալը:

Նրա կարծիքով, ողջ քրեական գործը շոու է, իսկ այս ամենն իրեն «պռատիվնիա», իսկ դատաքննության վերաբերյալ իր կարծիքը կհայտնի հետո:

Դատարանի այն հարցին, թե արդյոք ամբաստանյալը մասնակցել է Նապոլեոն Ազիզյանի տանը կատարված քննչական փորձարարությանը՝  ամբաստանյալը տվեց դրական պատասխան և նշեց, որ ինքը ձեռքով ուղղակի ցույց է տվել: Նիստը նախագահող դատավոր Մեսրոպ Մակյանը հիշեցրեց, որ դատարանը մի քանի նիստ առաջ հետազոտել է այդ  քննչական փորձարարության տեսագրությունը, որտեղ ամբաստանյալը խոսում էր և ցույց տալիս, ամբաստանյալը հայտարարեց, որ նման բան ինքը չի հիշում:

Դատարանի այն հարցին, որ  եթե ամբաստանյալը չի  կատարել այդ հանցանքները, ապա  ինչու՞ է նախաքննական մարմնի «ընտրությունը» կանգնել հենց նրա վրա՝ որպես այս հանցագործությունները կատարողներից մեկի՝ ամբաստանյալը նշեց, թե «հարմար թեկնածու էինք էլի, դատվածություներով նայեցին, երևի դրա համար»:

Ամբաստանյալը որպես հաջորդ տարբերակ էլ նշեց իր հասակը, «տուժողները ասել են բոյով ա» ինքն էլ համապատասխանել է:

Հաջորդ նիստին ամբաստանյալին հարցեր կուղղի նրա փաստաբանը։