Փաստ ինֆո

Ամուսնու նախկին սիրուհու նկարները «odnoklassniki.ru» սոցիալական ցանցում տեղադրելու մեջ մեղադրվող Ռուզաննա Սնջոյանը մեղավոր է ճանաչվել ՀՀ քրեական օրենսգրքի 144-րդ հոդվածով և դատապարտվել տուգանքի 250 000 ՀՀ դրամի չափով: Նշենք, որ մեղադրող դատախազը միջնորդել էր Ռուզաննային դատապարտել տուգանքի՝ 300 000 ՀՀ դրամի չափով:

Ռուզաննա Սնջոյանի պաշտպան Կարեն Մանուչարյանը «Փաստինֆո»-ի թղթակցի հետ զրույցում անարդարացի գնահատեց դատավճիռը` նշելով, որ պատրաստվում են  այն բողոքարկել վերաքննիչ դատարան:

Ըստ փաստաբանի, պաշտպանական կողմի ներկայացրած ապացույցները բավարար էին հաստատված համարելու համար, որ Ռուզաննայի որդին է տեղադրել լուսանկարը և այդ հիմքով գործը կարճվեր: «Անհասկանալի է, թե դատարանը ինչ տրամաբանությամբ է ղեկավարվել և ինչու այդպես վարվեց»,- ընդգծեց փաստաբանը:

Հիշեցնենք, որ 37-ամյա Ռուզաննան մեղադրվում է այն բանի համար, որ «odnoklassniki.ru» սոցիալական կայքում ստեղծել է ամուսնու նախկին սիրուհու` Գայանեի անվամբ էջ, որտեղ, առանց վերջինիս համաձայնության, տեղադրել է նրա մերկ լուսանկարը: Գայանեի վերաբերյալ անձնական գաղտնիք պարունակող տեղեկություն տարածելու համար Ռուզաննային մեղադրանք է առաջադրվել՝ ՀՀ քրեական օրենսգրքի 144-րդ հոդվածով:

Դատաքննության ընթացքում Ռուզաննայի անչափահաս որդին հայտարարեց, որ իրականում ինքն է լուսանկարը տեղադրել սոցիալական ցանցում` վրեզխնդրությունից դրդված, իսկ մայրն էլ, գործով ամբաստանյալ Ռ.Մնջոյանը հայտարարեց, որ  ի սկզբանե չի ցանկացել, որպեսզի որդին ներքաշվի այս պատմության մեջ և նախաքննական մարմնին հայտնել է, որ ինքն է այդ լուսանկարները տեղադրել սոցիալական կայքում, սակայն իր 15-ամյա անչափահաս որդին պնդել է, որ պետք է դատարանում հայտնի այդ մասին:  Տղան դատարանում հարցաքննվել է պաշտպանական կողմի միջնորդությամբ, որի ժամանակ հայտնել է, որ տանն ունեն մեկ համակարգիչ, որից օգտվում են բոլորը, սակայն մայրը չունի բավարար գիտելիքներ՝ համակարգչից օգտվելու համար. տղան մորը սովորեցրել է միայն, թե ինչպես նամակագրական կապ հաստատի և այդպես հաղորդակցվի ՌԴ-ում գտնվող ամուսնու և ընկերուհիների հետ

Անչափահաս տղան նաև նշել էր, որ տարիներ շարունակ իրենց տանը տեղի ունեցած վեճից հասկացել է, որ հայրը սիրուհի ունի, բացի այդ, տուժողն անընդմեջ զանգահարել է իրենց տուն, օրվա բոլոր ժամերին, անգամ հնչել են սպառնալիքներ տղայի հասցեին:

Ինչպես արդեն տեղեկացրել էինք, տղան իր ցուցմունքում նշել էր նաև, որ «Odnoklassniki.ru» սոցիալական ցանցում այցելել է հոր անվամբ բացված էջը, որտեղ տեղադրված բազմաթիվ լուսանկարներում պատկերված են եղել հայրը, սիրուհին և 1 տարեկան երեխա, մի շարք նկարներում հայրն ու սիրուհին եղել են գրկախառնված: Հայրը տղային հավաստիացրել է, որ դա իր էջը չէ, իսկ վերջինս էլ խնդրել է, որպեսզի սիրուհին ջնջի այդ նկարները:

15-ամյա տղայի խոսքով՝չնայած իր խնդրանքներին լուսանկարները սոցիալական ցանցից տուժողը չի հանել։ Ուստի՝ ինքն էլ որոշել է նոր էջ բացել տուժողի անվամբ և տեղադրել է հոր հիշողության կրիչի մեջ հայտնաբերած տուժողի մերկ լուսանկարները, որպեսզի, ինչպես անչափահաս վկան ասաց, «տեսնի ու ամաչի, ջնջի մյուս նկարները»: