Փաստ ինֆո

Աշխարհի այս առաջնության ամենաանհավանական հանդիպումը. գովաբանված Հոլանդիայի հավաքականը միայն հետխաղյա 11-մետրանոցների հարվածաշարում կարողացավ հաղթել Կոստա Ռիկայի համեստ հավաքականին:

Ավելի քան 120 րոպե տևեց զուտ ֆուտբոլային պայքարը, որի ընթացքում, պետք է ընդունել, հոլանդացիները թելադրում էին խաղի ընթացքը, ունեցան դարպասը գրավելու բազում պահեր, բայց չկարողացան գնդակը դարպասի գծից ներս անցկացնել: Երկու անգամ լատինաամերիկացիներին օգնության հասավ դարպասաձողը, հիմնական ժամանակի ավարտին էլ պաշտպանը գնդակը հետ մղեց դատարկ դարպասից, իսկ, թե քանի պահ վատնեց միայն Ռոբին վան Պերսին՝ ավելի լավ է լռենք:

Որքան էլ տարօրինակ է, բայց կոստառիկացիները միայն լրացուցիչ ժամանակի երկրորդ խաղակեսում հիշեցին մրցակցի դարպասի մասին: Այն էլ, երբ թվում էր, թե նրանք արդեն ուժասպառ են և հազիվ են քարշ տալիս ոտքերը: Իսկ 117-րդ րոպեին Մարկոս Ուրենիան քիչ էր մնում արարեր առաջնության ամենահնչեղ սենսացիան. գործնականում միայնակ ճեղքելով հոլանդական պաշտպանությունը՝ նա չկարողացավ դիպուկ կատարել վերջին հարվածը, որից հետո հոլանդացի դարպասապահ Յասպեր Սիլեսենը հրաշքով փրկեց իր թիմին: Այնուհանդերձ, Սիլեսենին վիճակված չէր դառնալ հանդիպման հերոսը:

Հոլանդիայի հավաքականի գլխավոր մարզիչ Լուի վան Գալն արտասովոր քայլի դիմեց՝ լրացուցիչ ժամանակի վերջին րոպեին փոխարինելով դարպասապահին: Այդպիսով, հերոս դառնալու պատիվն անցավ Թիմ Կրուլին, որը լիարժեք օգտվեց հնարավորությունից: Հարվածաշարի ժամանակ նա հետ մղեց Բրայան Ռուիսի և Մայքլ Ումանիայի ոտքերից եկած գնդակները: Իսկ հոլանդացիները սառնասրտորեն իրացրին բոլոր չորս հարվածները, որոնցից վերջինը կատարեց Դիրք Կեյտը:

4:3 և Հոլանդիան կիսաեզրափակչում կխաղա Արգենտինայի հետ: Բայց, միթե՞ ջերմ խոսքերի արժանի չէ նաև Կոստա Ռիկան: Միանշանակ՝ արժանի է…

 

Հեղինակ` Հրայր Նազարյան